TELOK MELANO: Pengudah 11 hari bejalai penyauh 2,154 kilometer (km), Yang di-Pertuan Agong Al-Sultan Abdullah Ri’ayatuddin Al-Mustafa Billah Shah nembuka Kembara Kenali Borneo di Telok Melano, Lundu, pukul 12.37 tengah hari, kemari.
Konvoi ti abis ba pengabis Jalai Besai Pan Borneo (LPB) mujur nembuka pejalai Agong ba Pulau Borneo enggau tuju semak agi enggau rayat di Sabah enggau Sarawak.
Palan kepenudi dilawa Agong ti disempulang tiga iku anak iya richah disambut beribu rayat ari dalam enggau menua ti datai kenyau ari pukul 7 pagi laban gagit deka betemu lalu begambar enggau raban DiRaja nya.
Udah nya, Agong betemu enggau lebih 1,000 iku ti sanggup nganti penatai konvoi nya lalu bisi sekeda sanggup bemalam dia.
Iya mega udah bejadi Pengawa Nasih Tanah Masjid Al-Sultan Abdullah, Telok Melano ke deka digaga ngena agih belanja penyampayu RM5 juta ditangkan pengawa merarau.
Agong mega udah mendingka penerang bekaul status pejalai projek LPB Sarawak ti diatu udah tembu 97 peratus.
Sama datai tiga anak Agong iya nya Pemangku Raja Pahang, Tengku Hassanal Ibrahim Alam Shah Al-Sultan Abdullah Ri’ayatuddin Al-Mustafa Billah Shah; Tengku Panglima Raja, Kolonel Tengku Amir Nasser Ibrahim Shah enggau Tengku Panglima Perang Tengku Ahmad Ismail Mu’adzam Shah.
Sapit Menteri Besai, Datuk Seri Fadillah Yusof; Pemangku Tuai Pemegai Menua (TYT) Sarawak, Tan Sri Datuk Amar Mohamad Asfia Awang Nassar sereta Premier Sarawak, Datuk Patinggi Tan Sri Abang Johari Tun Openg mega bisi datai.
Urung 33km ari Pasar Sematan enggau penyauh urung 30 minit, rentayan Telok Melano-Sematan nya begian LPB keterubah ti ditembu enggau berengkah dibuka ngagai mensia mayuh kenyau ari Januari 2019.
Rentayan ba barat daya Borneo beentara enggau wilayah Kalimantan Barat, Indonesia nya pun pemungkal Jalai Besai Pan Borneo meraka timur Palan Dijaga Samunsan sereta Taman Negara Tanjung Datu enggau Gunung Gading nyadi pematak temuai.
Palan nya siti ari legasi ti ditinggal niang Tan Sri Adenan Satem ungkup rayat Tanjong Datu lebuh iya nyadi Kepala Menteri Sarawak kelia ba taun 2014 ngagai 2017 sebedau midang ketegal sakit jantung.
Taja pia, perambu asal nya dikena ngaga jalai besai ari Sematan ngagai Miri aja tang nitih peminta niang lebuh nya, Menteri Besai keenam, Datuk Seri Najib Tun Razak ngemendar pakej pejalai Telok Melano mungkur ungkus tambah RM580 juta.
Naka diatu, pengawa muka rentayan Telok Melano-Sematan udah ngubah pengidup peranak ba sitak nya suba ke semina ulih dilawa ngena jalai ai.
Ungkup rikod, Agong enggau raban iya datai ba mengeri Kuching malam Hari Dua tu tadi sebedau ngepunka pejalai penyauh 137KM ngambi datai ba Kilometer 0.
Iya disempulang Raja Permaisuri Agong Tunku Azizah Aminah Maimunah Iskandariah sereta anak indu enggau anak lelaki sida ngepunka pejalai di Tawau kena 3 September lalu sangkai ba sekeda palan di Sabah, Lawas, Brunei, Miri, Bintulu, Sibu, Sarikei, Sri Aman lalu ke Kuching enggau kepenudi di Telok Melano sebedau pulai ke Kuala Lumpur lemai kemari.
Sepanjai pejalai nya, raban Agong richah diambat rayat ti nganti lalu peluang betemu enggau tuai menua nya endang enda dibasau ba sepanjai LPB ba palan ditengah konvoi nya.
Mayuh ti sanggup nganti ba tisi jalai ukai semina maya panas tang mega enda beginsit taja ujan bangat enggau nyentuk tengah malam.
