MIRI: Mensia mayuh diperansang ngambi bagi ba Kimpin Meri Darah ti diatur Pustaka Nengeri Sarawak Pampang Miri kena 27 Ogos enggau 25 November tu.

Pegawai Pengatur Korporat, Shirley Szebah Mambai madah, Kimpin Meri Darah ti diatur kena 20 Mei tu tadi mujur ngumpul 45 pain darah.

Semua pain darah nya digumpul ari 62 pemeri darah ti udah rejister diri.

“Pustaka Miri chukup beterima kasih ngagai timbal manah ari mensia mayuh kelebih agi komuniti Miri ti udah ngemujur kimpin tu.

“Pekara tu ngelai mensia mayuh sedar pengawa meri darah tu ulah ti tuchi.

“Pia mega, pekara tu narak semangat ngembuan pangku pengawa dikena nyelamatka nyawa orang bukai,” ku iya.

Kimpin nya ti diatur ba Bintang Megamall Miri nya diatur begulai Tabung Darah Sepital Miri enggau gerempung ukai dikuasa perintah (NGO), Soka Gakkai Malaysia.

Iya madah, bala pemeri darah bisi diberi kuie enggau tepa dikena masa sukung sida ngagai kimpin nya.

Mensia mayuh ti deka nemu silik senentang kimpin nya diperansang betanya terus ngagai Shirley ba lumur 085-422525 tauka email shirleysm@sarawak.gov.my.