Kemendar jampat bayar chengkeram RM1 bilion

KUCHING: Opis Menteri Wang Perintah Besai dipinta ngerumban pengawa meri pemendar bayar chengkeram RM1 bilion ngagai Sarawak dikena nyeleti sekula repuk baka ti disempekat sebedau tu.

Menteri Pelajar, Sains enggau Pansik Teknologi Datuk Sri Michael Manyin Jawong madah ulah opis menteri ti laun ngemendarka bayar nya ngujungka pengawa nyeleti sekula repuk tejanggal taja udah bisi belanja diagih.

“Kepala Menteri (Datuk Patinggi Abang Johari Tun Openg) udah nyendiaka chek RM300 juta ungkup taun tu tang lalu bedau bulih pemendar ari Opis Menteri Wang.

“Enti enda, kami udah ulih bejalaika pengawa nyeleti sekula repuk kelebih agi sekula ba menua pesisir,” ku iya.

Iya madah mansutka jaku nya lebuh ditanya pemberita ngarika Kepala Menteri bejadi Aum Besai Pelajar Gerempung Prinsipal Sekula Sekondari Sarawak Ke-54 ba sebuah hotel tebilang ditu tadi.

Ku iya, bayar RM1 billion nya dipejalai berenggat ke alai perintah Sarawak terubah deka mayar RM300 juta, bayar kedua RM300 juta lalu bayar ketiga RM400 juta dalam timpuh dua taun.

Belanja nya deka dipejalai enggau dipatau sebuah komiti tiga ejensi ti datai ari Opis Menteri Wang, Opis Menteri Pelajar enggau Perintah Sarawak.

Sebedau macha teks jaku Kepala Menteri, Manyin bisi nibarka jaku lalau ngagai bala prinsipal bejalaika pangku pengawa sida ngasi agi.

“Enti kitai dekaka semua pengawa jampat tembu, kitai enda tau enda bejalaika pangku pengawa diri ngasi agi maya merambu sebarang pengawa.

“Aku empu kala ngasai baka ni pemerat pangku pengawa nyadi prinsipal, nya kebuah aku ngemai semua kitai besaup gawa enggau manah,” ku iya meransang.

Ngelansa pasal ngajar subjek Sains enggau Matametik ngena jaku English, iya ngelempaika pengarap besai enggau sukung ari apai indai enggau nembiak.

“Enti apai indai nembiak enda setuju enggau atur tu, pengawa tu enda deka nyadi nyata sereta puntan.

“Nya alai, aku minta bala prinsipal meri semengat sereta peransang ngagai apai indai nembiak awakka nyukung pengawa tu.

“Kitai mega nadai kala ngelaungka bala pengajar laban sida tu nyadi tiang pemun pemujur juluk tu.

“Sida tu mega deka dipatih ngena jaku English lebuh ngajar subjek Sains enggau Matametik,” ku iya nambah.

Michael Manyin madahka program matih 2,657 iku pengajar ti ngajar subjek Sains enggau Matamatik ngena jaku English deka berengkah dipejalai pun bulan September tu.