KUCHING: Roadshow Advokasyen Pengelikun 2023 Jalai Besai Pan Borneo (LPB) Sarawak deka diatur ba 12 bagi menua ba nengeri tu.
Sapit Menteri Infrastruktur enggau Pemansang Penyangkai Kapal, Ir Aidel Lariwoo madah, program nya sebengkah kimpin dikena meri penerang enggau penyedar ngagai mensia mayuh bekaul atur, advokasyen enggau pengelikun ba LPB.
Iya madah, nya sebengkah inisiatif beguna dikena meri penyedar ngagai rayat Sarawak laban jalai besai nya agi baru dikena.
“Program advokasyen betampung tu nyadi inisiatif meri pelajar enggau lalau ngagai penguna ngambi ngasika atur jalai alun ba LPB.
“Urung 200 nyentuk 400 tuai komuniti enggau tuai genturung pendiau (KMKK) ti mungkur mayuh opis pelilih enggau peranak dikangau ngulu licha tu.
“Nengah program tu, sida deka bekunsi penerang ti diterima ngagai rayat dipegai sida,” ku iya.
Aidel mansutka jaku nya rambau Program Bejadi Roadshow Advokasyen Pengelikun 2023 LPB ba Balai Baitulmal ditu, kemari.
Ngelansa senentang video dikemegau ba media rama ti mandangka penguna LPB deriba ba arung ti salah, ngaga pusin U ba endur ti salah kelimpah kelalu laju ti ulih ngeruga pengelikun orang bukai enggau penusah aksiden, Aidel ngarap program nya ngasi mutarka penanggul nya.
Iya madah, bisi kes enchuri enggau vandalisme ngagai perengkaguna disedia ba sepanjai jalai besai nya.
“Taun tu aja, kitai udah meda kes aksiden ba LPB majak nambah kelebih agi maya musin pengerami.
“Nya alai, aku ngarap semua ti ngulu program tu ulih bekunsika penemu ngagai rayat dipegai sida,” ku iya.
Program nya diatur begulai Opis Kereja Raya (JKR) Sarawak enggau Polis DiRaja Malaysia (PDRM), Opis Pengangkut Jalai (JPJ) Sarawak sereta raban Pan Borneo Highway Sdn Bhd (PLPS).
