KUCHING: Tanggungpengawa mensia mayuh bekenaka sengkabung mua maya rengga enggau tabin beguna amat ke pemaik begulai.
Menteri Pemansang Indu, Nembiak Mit enggau Pengelantang Komuniti, Datuk Seri Fatimah Abdullah madah, taja pen atur ngena sengkabung mua nya deka diketu tang semua kitai ngembuan pangku pengawa nagang pengerekai igi penyakit COVID-19.
“Enti kitai ngasaika diri bisi ngembuan kelai rengga enggau tabin, kitai meseti ngena sengkabung mua.
“Kitai udah idup enggau COVID-19 tu lebih ari dua taun, nya alai, pengawa ngena sengkabung mua tu ukai pekara ti mar dikereja.
“Kebuah pia laban kekadang kitai ngasai bisi pekara ti tinggal lebuh kitai enda ngena sengkabung mua,” ku iya.
Fatimah mansutka jaku nya lebuh rambau dirandau pemberita pengudah bejadi Women Leadership Training Camp for all Federation of Chinese Association Women Section ba Aeroville ditu, sehari tu.
Dulu ari nya, Menteri Pengerai, Dr Zaliha Mustafa madah, berengkah ari 5 Julai tu, atur ngena sengkabung mua ba perengka pengangkut mensia mayuh enggau palan pengerai deka diketu.
Ngelansa pekara nya, Fatimah madah, semua atur nya endang bepelasar ke rikod sereta pansik Komiti Penyangga COVID-19 ba renggat Perintah Besai enggau Perintah Nengeri.
