Kemeratka agi pemansang ba rumah panjai

ENGKILILI: Ketuai Nembiak Parti Sarawak Bersatu (PSB) Dr Johnical Rayong Ngipa mejah polisi perintah ti deka bebendar agi ngaduka pemansang ba kandang mengeri.

Iya madah, ulah nya jauh bechiping enggau rayat di menua pesisir ti agi mengkang randaka pemansang.

“Polisi perintah bebendar ngaduka pemansang di mengeri enda tentu engkeman ba aku.

“Enti nunda rayat di rumah panjai patut agi dikemeratka kitai laban agi mayuh pemansang empai datai lebih agi baka pemansang bekal karan enggau ai paip,” pia ku iya madah.

Iya mantaika jaku tu maya bejadi Aum Besai enggau Kus Tanggungpengawa Ketuai Raban Bansa enggau Tuai Rumah DUN 33 Engkilili ke diatur Gerempung Ketuai Raban Bansa (PKKM) N,33 Engkilili ba sebuah hotel ditu, kemari.

SIRUKA RAYAT…Dr Rayong nyuaka chek ngagai siku ari pengari gerempung maya pengerami nya, kemari.

Kaban Kunsil Nengeri (Adun) Engkilii nya maya tu mega madahka iya nadai agi diungkup geran Projek Transformasyen (RTP) ketegal udah disekat perintah nengeri.

Tang ku iya, rayat Dun Engkilili anang pechayaka jaku ti ngumbai iya nadai geran agi diberi ngagai rayat.

“Aku semina ngarapka rayat ditu besabar dulu nganti geran ari aku.

“Aku endang naka ulih ngiga jalai ngambika rayat bela nerima geran tauka bantu,” ku iya madah baru.

Ba pengerami tu, Dr Rayong bisi nyuaka chek bantu enggau pemeri ngagai Komiti Pengelikun enggau Pemansang Genturung Pendiau (JKKK) Jambu Arap sepenyampau RM10,000, Gerempung Apai Indai enggau Pengajar (PIBG) SK No 2 Engkilili enggau Gerempung Indu Jambu Arap Skrang sama bela RM5,000.