KAPIT: Kaban Parlimen Hulu Rajang, Datuk Wilson Ugak Kumbong ngelalau mensia mayuh bela bejimat lebuh bebaikka entukar beserimbai pengerami Hari Krismas enggau Taun Baru tu.
“Aku arapka mensia mayuh ti mulai kediri ngagai menua nengah jalai Ngemah ngagai Song nguna jalai sawit, keterubah iya bejaga mih pengelikun diri enggau nguna ‘4×4 wheel drive’ ti betul,”
“Lebuh ngabang ngagai pangan diri enti asai udah ngelu pala anang majak kediri deriba kerita awakka kitai ulih nyeliahka diri ari sebarang penusah bebadi ba jalai alun,”
Ugak madahka mensia mayuh patut lebih meratika pengelikun diri enggau kerita maya ngabang berindik ari kes enchuri kereta majak nyadi kemaya hari tu.
Kelimpah ari nya, mensia mayuh ke betengahka jalai darat patut meresa brek, minyak kerita enggau patut servis kerita dulu sebedau mindah ke endur bukai.
“Lebuh betengah ke jalai darat, enti hari bangat ujan kita patut ngetu dulu anang guai neruska pejalai laban kitai sama nemu enti hari ujan jalai nya luchak sereta lichin lalu ngujungka tayar ulih tepawah ke bukai,”
“Kitai sama nemu diatu raban kunteriktor benung ngemanahka jalai darat, Ngemah ke Song nya alai mensia mayuh patut nitih atur ke udah dipadah piak bekuasa enti bisi penanggul maya betengahka jalai tu,”ku Ugak lebuh dirandau Suara Sarawak bekaul enggau pesan Krismas ke disambut raban Kristian pagila.
