Kemisi Gawai di menua diri lebih ngemantup ati

KUCHING: Jam kemisi dikena ngintu pengerami hari besai bekaul enggau adat asal diri endang dianti tiap iku kitai.

Tang ketegal tanggungpengawa nyaga pengelikun menua ngasuh Staff Sarjan John Anak Ruwi, 36 taun jarang pulai ke menua lebuh pengerami Gawai.

Ku John, iya baru lima taun gawa ba menua diri (Sarawak).

Sebedau tu, iya madah diri gawa di Wilayah 1, Pahang lalu nadai kala bisi awak kemisi lebih agi rambau pengerami Gawai Dayak.

“Aku udah lama gawa nyadi soldadu, lalu tu taun kelima aku gawa ba Sarawak.

Staff Sarjan John Ruwi

“Ngelama tu, aku gawa ba menua Semenanjung, tang nadai kala pulai ke menua ngintu pengerami,” ku iya.

Tang diatu, ku John, iya chukup gaga ati laban ulih gawa ba menua diri.

“Suba jauh ari menua, pedis ka bulih kemisi lebuh pengerami.

“Diatu, aku udah ba menua diri, lalu chukup gaga laban semak enggau diri sebilik,” ku iya ti mega siku peranak Bidayuh ari Kampung Peraya, Padawan.

Nangkan nya, John madah taun tu kemisi iya enda lama laban kemisi Hari Gawai enggau Hari Raya chukup sempil.

“Taun tu aku semina kemisi beberapa hari aja, tang nya nadai penanggul laban diatu aku udah semak enggau menua diri.

“Taun 2018, laban Hari Gawai enggau Hari Raya kira takah seminggu, nya alai kemisi pan lebih panjai mega,” ku iya madah enggau gaga.

Kelimpah ari nya, John mega madah, taja benung kemisi, sida pemesai tinggi ulih ngangau ke sida nurun gawa enti bisi pekara tauka penanggul nuntung bekaul enggau pengelikun menua.

Ku John, nya udah tanggungpengawa nyadi raban soldadu lalu anang ketegal kemisi, pengawa enda dikemerat.

Nya alai, John ngarapka ba pengerami Hari Gawai taun tu ulih diintu enggau likun sereta lantang.

“Bala mayuh ke pulai ngagai menua diri patut beratika pengelikun rumah, ngambika nadai pengawa enchuri nyadi.

“Pia mega, anang enda ngemeratka pengelikun maya mai perengka pengangkut pulai ke menua,” ku John.