Kemisi Krismas enggau Taun Baru, diau jenuh aja dikena mutuska pengerekai Covid-19

KUCHING: Menteri Kaunsil Kandang Menua enggau Pengawa Berumah, Datuk seri Dr Sim Kui Hian ngelalau rayat Sarawak diau ba rumah enggau anang ngusung rumah orang bukai maya kemisi Hari Krismas enggau Taun Baru tu ngambi mutuska pengerekai Covid-19.

Ku iya, rayat mesti diau ba rumah aja maya ngintu pengerami nya laban inisiatif perintah tu nentuka rayat ulih ngintu Hari Krismas enggau Taun baru ke bukai dudi hari.

“Kami enggai tu pengerami kepenudi diintu semua rayat laban kitai udah ngasaika mayuh pekara, taun tu.

“Nuju rayat Sarawak ti diau ba luar Sarawak, aku ngarapka sida berundingka pemutus tauka nangguh dulu perambu pulai ke menua,” ku iya.

Dr Sim mansutka jaku nya ba aum pemberita pengudah bejadika Hari Anti Makai Suap Entarabansa (HARA) 2020 ba Wisma Bapa Malaysia, ditu kemari.

Terang iya, atur nyaga takah sereta ngena sengkabung mua mesti dititih ngambi nagang pengerekai Covid-19 taja Sarawak nyau deka bulih vaksin Covid-19.

Dr Sim ti mega kaban Komiti Penyangga Penusah Nengeri Sarawak (JPBNS) meri terima kasih ngagai rayat Sarawak laban udah meri kerejasama ngelandaika kes Covid-19.

Iya ngarapka semua rayat meri kerejasama maya kemisi hari Krismas enggau Taun Baru sama baka lebuh ngintu Pengerami Gawai Dayak enggau Hari Raya tu tadi.

“Rayat ke diau ba Semenanjung Malaysia ti deka pulai kemisi dipinta diau din dulu sama baka Pengerami Gawai enggau Hari Raya tu tadi.

“Pia mega, sida ti diau ba mengeri dipinta anang mindah enggau pulai ke menua.

“Aku ngelalau sida ke diau ba Sarawak anang nemuai ngagai nengeri dikategori zon mirah ba Semenanjung Malaysia enggau Sabah.

“Kebuah pia laban tebal agi kes Covid-19 ti diripotka ba Sarawak nya ketegal kes import ngaul rayat Sarawak.

Nambahka nya ku Dr Sim, kitai mega enda nemu engka kitai mai igi penyakit ngagai diri sebilik, bala bakih tauka komuniti.

“Nya alai, kitai enggai Sarawak ngerikod kes pemati laban udah lenyau 19 nyawa ketegal Covid-19 kelimpah vaksin nya deka datai.

“Ba selampur Malaysia, lebih ari 75,000 rayat dirampit taun tu enggau 34,000 kes bulan nyin tadi,” ku iya nerang.

Ngelansa pasal vaksin, Dr Sim madahka vaksin nya deka datai ba Malaysia pun taun nyin ila.

“Kami nemu semua rayat ba serata dunya udah bendar ngulihka vaksin nya lalu ba penemu aku, kitai mesti ngelempaika tanggung pengawa tu ngagai pakar perubat meresa vaksin nya.

“Ambika banding, ba United Kingdom, sida begunaka pakar pengerai meresa vaksin nya laban kitai mesti nentuka semua vaksin selamat dikena sebedau diberi ngagai rayat,” tandu iya.

Kelimpah ari nya, iya madahka Menteri Besai Tan Sri Muhyiddin Yassin madahka Putrajaya udah nyain sempekat tumu enggau serikat farmasi Pfizer ngulihka 12.8 juta dos vaksin Covid-19 ungkup 6.4 juta rayat Malaysia.