Kemisi penggal sekula enda patut dikinsil – KGBS

KUCHING: Serakup Pengajar Bumiputera Sarawak (KGBS) minta kemisi penggal sekula mengkang baka udah ditaga Opis Menteri Pelajar Malaysia (KPM).

Presiden Ahmad Malie madah, kemisi penggal nya patut diberi ngambi bisi awak endur bala nembiak melepaka runding ti kusut lebuh ngulu Pengawa Ngajar enggau Belajar ari Rumah (PdPR).

“Taja jam bala nembiak belajar dipeda bisi rawak, tang sida semampai kusut runding sekumbang PdPR dipejalai sebedau tu.

“Nya alai KGBS minta mensia mayuh anang ngumbai kemisi sekula sekumbang Covid-19 tu enda beguna,” ku iya madah ngagai Suara Sarawak, tadi.

Ahmad mansutka sadang penemu nya nimbal perambu Gempung Apai Indai Malaysia (Mimbar) ngambi kemisi sekula taun tu dikinsil.

Berindik ari nya ku iya, KGBS mantah perambu nya laban mensia mayuh nya meda bala pengajar enggau nembiak tu baka nadai ngereja pengawa sida sekumbang PdP dalam kelas ditangguh.

“Kami ba KGBS sedia ngulu randau pasal pekara nginsil kemisi sekula tu enti sema dikangau,” ku Ahmad nyimpul randau.

Suara Sarawak