BINTULU: Berita anak Sarawak nerima The Civil Engineering Management Prize ari University of Manchester, United Kingdom (UK) ngasuh kitai temegah ati.

Dulu ari tu, Suara Sarawak kala mantaika penyulut endu Fazlynna Elty Christermaller, siku anak Sarawak ba pelajar udah diaku ba tikas entarabansa.

Anugerah tu diberi ngagai endu Fazlynna kelai udah mujur nembuka Individual Project (Tesis) ungkup taun 2019 enggau 2020 nitihka pelajar diambi iya.

Serak tu, peranak asal Bintulu nya deka bekunsika peneleba diri sekumbang nampung pelajar ba menua orang lalu baka ni iya tau bulih anugerah nya.

Lebuh dirandau Suara Sarawak, iya ke tampak agi dikangau Fazlynna madahka diri kebendar endang enda nemu projek tu bisi meri anugerah.

Ku iya, anugerah tu diberi Department of Mechanical, Aerospace and Civil Engineering beserimbai enggau pemujur nembiak dalam Individual Project.

BELAJAR NGATIKA DIRI

Iya madah, semua nembiak ba taun ketiga bisi projek kediri empu lalu projek kepenudi nya deka dinilai bala ari Department of Mechanical, Aerospace and Civil Engineering.

“Sekumbang ngaga projek tu, aku endang enda nemu palan pelajar tinggi tu bisi meri anugerah nitihka kategori.

“Aku ngaga projek tu enggau manah laban kredit pas dalam projek tu endang tinggi nentuka kami ulih graduet pengudah tembu tesis tu.

“Maya milih projek ti deka dipejalai, aku endang udah netapka deka ngaga projek pasal Malaysia.

“Pengudah milih projek ke deka dipejalai, aku enda nemu projek ti dipilih deka ngena database.

“Nya kebuah, aku napi pemar lebuh keterubah ngaduka projek tu suba laban enda nemu baka ni ngepun enggau ngulihka data.

“Tang, raban ari palan pelajar tinggi enggau supervisor seruran nyaup aku kelimpah menyadi aku mega siku injinir perintah di Kuching.

“Menyadi aku mih mayuh nyaup aku nerang utai ke enda ditemu aku ngambi projek ti dipejalai tu lanchar magang.

“Supervisor mega seruran nyaup aku nyema bisi utai enda ditemu kelimpah meransang aku ngambi ransing nembuka projek tu, aku berasai lantang ati ngaga projek tu lebuh bisi minat.

“Pesan aku, lebuh ngaga projek kitai mesti bebendar ngaga iya sereta minta timbal lalu aduka baru nyema bisi utai salah tauka kurang dalam projek nya.

“Anang mantul ngapa seagi utai dikereja kitai bedau ngemantupka ati laban terubah ngaduka pengawa endang tusah tang nyau ke lama lanchar agi ga pengawa diaduka kitai nya,” ku iya lalu tuchum.

RANSING NGIGA PENEMU

Nampung randau silik agi, Fazylnna madahka diri kala besekula ba Sekula Primari (SK) St Anthony, Bintulu ari taun 2004 ngagai 2007 sereta besekula ba SK Jalan Muara Tuang, Kota Samarahan ari taun 2008 ngagai 2009.

Ba sekula sekondari, iya besekula ba Sekula Sekondari (SM) Sains Kuching (SainsKu) ari taun 2010 ngagai 2014 lalu ba taun 2015 ngagai 2017, sebedau nampung pelajar ba Cempaka International School.

Udah nya, Fazlynna nampung pelajar ba University of Manchester, United Kingdom dalam taun 2017 nyentuk diatu.

“Pengudah bulih pemutus peresa SPM suba, aku minta lalu nguji sekularship baka JPA-MARA.

“Maya minta sekularship JPA-MARA, aku diasuh datai assessment tauka dikumbai kitai peresa lalu JPA deka mantaika penerang dalam portal berapa minggu udah nya sekalika bulih tauka enda.

“Lebuh ngelawa portal nya, sida madahka aku mujur bulih sekularship, naka mih pengaga ati lebuh nya laban ulih nampung pelajar ke tinggi agi.

“Pengudah mujur bulih sekularship, aku nampung pelajar A-Level ba kolej ti disedia iya nya Cempaka International School.

“JPA endang bisi madahka tagit ke mesti dijapai nentuka bala nembiak ba kolej nya ulih nampung pelajar ngagai tikas ke tinggi agi.

“Nya kebuah, semua kami ti besekula ba kolej nya mesti belajar bebendar ngambi ulih nampung pelajar ngagai tikas ke tinggi agi sereta diterima belajar ba menua luar.

“Enda nyangka amat ga tudah diri pas lalu diberi peluang nampung pelajar ba menua tasik udah nya.

“Lebuh nerima surat bulih nampung pelajar ke menua tasik, aku endang chukup gaga laban ulih ngasaika peneleba belajar sereta ngasaika budaya ba menua luar,” terang iya.

Anak kedua ari tiga iku diri menyadi tu madah, pengudah tembu belajar ba kolej nya, sida deka masuk ngagai palan pelajar tinggi di UK nya nengah UCAS.

Ku iya, UCAS tu baka UPU ti dikena kitai sebedau nampung pelajar ngagai tikas ke tinggi tang UCAS tu ungkup nembiak ti deka nampung pelajar tinggi ba UK.

Iya mega madahka palan pelajar tinggi nya mesti netapka syarat minimum sentang pemutus A-Level nentuka kitai nampung pelajar ngagai UK nya.

KENANG MANIS

Berebak enggau nya, Fazlynna madahka bala bakih ari menua luar nadai penanggul nerima sida ari menua bukai.

Ku Fazlyna, sida mega bebakih manah enggau nembiak ari menua nya empu laban sida besekula dia ngembuan tuju ti sebaka iya nya ngiga penemu.

“Aku suah nusuika budaya enggau mantaika gambar pemakai kitai di Sarawak ngagai bala bakih baka laksa, mi kolo enggau bemacham bansa kuih.

“Sekumbang nyau deka lima taun besekula ba Manchester tu, aku ulih nelebaka diri enggau gaya idup ditu taja bebida ari sukut budaya, zon enggau pemakai sida.

“Aku mega chukup temegah lebuh berandau sereta beratika buah runding dibantaika bala bakih ari menua maju.

“Ari nya tadi, aku belajar ngubah runding aku sebaka enggau sida kelimpah aku berasai rindu meda chara kereja enggau pengidup di UK.

“Ambika banding, enti udah abis kelas, bala pengelicha enda ngachau bala nembiak baka meri kereja sekula baru.

“Kebuah pia laban ba penemu sida, pengudah abis kelas nya mih maya bala nembiak belelak,” ku Fazlynna ngelansa.

Nambahka nya, Fazlynna madahka iya rindu beratika pemanah chara bala pengelicha gawa.

Fazlynna madahka sida deka betanya pekara pelajar ngagai bala pengelicha nengah email enggau Blackboard.

Terang iya, ba Blackboard nya mih endur bala pengelicha bekunsika pekara baru tauka gerah baru ngagai semua nembiak ba University of Manchester.

Iya mega madahka chara baka tu deka ngemuntangka sida nemu pekara baru sereta enda ibuh betanya ngagai bala pengelicha agi.

“Enti nusui pasal kenang manis, chukup mayuh kenang manis udah diasaika aku sekumbang nampung pelajar ba menua luar tu.

“Kesatu, aku bisi peluang nemuai ngagai endur ti ngerinduka ati baka suah dibantai sebelah media rama.

“Lebuh meda endur ti manah begaut mai bakih aku ngelawa endur nya ngambi bisi nyadi pengingat jemah ila.

“Kedua nya, maya belajar ba ditu, aku mega ulih main seleju, enti suba semina ulih meda aja orang bemain snow dalam TV.

“Tang diatu aku empu ulih megai sereta bemain snow, nya kebuah maya lepa aku endang bejalai matau menua ke suah dibantai dalam TV,” ku Fazlynna tuchum.

Taja pia, Fazlynna madahka iya chukup lelengau ngagai sida sebilik sekumbang nampung pelajar ba Manchester tu.

Tang ba dunya moden kemaya hari, bemacham chara ulih dikena kitai berandau enggau orang bukai taja enda berimbai pendiau dikena mantupka pengelengau.

Ari teknologi moden mega kitai ulih ngempit kaul enggau diri sebilik taja diau jauh ba menua luar.

“Diatu, lebuh lelengau ke apai seduai indai sereta bala menyadi, aku ulih video call aja taja bebida zon.

“Nya mih pemanah teknologi moden diatu laban ulih mantupka pengelengau kelebih agi enda ulih pulai ke menua,” ku iya nyimpul randau begulai enggau Suara Sarawak.