Kenang manis nemuai ke Sedabai

SEKALI tu aku deka mulaika pengingat enggau kenang manis dalam taun 1983 pengudah ngajar ba sekula sekondari pengelama lima bulan nyadi Prinsipal pemadu biak.

Sebedau hari pengada ke 29, aku dibai bala bakih nemuai ngagai sebuah rumah panjai keterubah digusung aku.

Pejalai nemuai ke rumah panjai nya laban dibai kaban aku benama Joseph Unting Umang ke alai lebuh nya, iya mangku pengawa nyadi Senator – siku Kaban Senator ba Perintah Malaysia.

Lebuh dipadu nyadi Senator, Unting maya nya beumur 65 taun dipilih nyadi Kaban Parlimen Kanowit.

SEJARAH SMK SEDAYA

PENUH BASA… Datuk Aaron Ago Dagang diatu Kaban Parlimen Kanowit bisi nyereta pejalai kami nemuai ngagai rumah panjai Sedabai.

Sekula endur aku belajar, Sekula Datuk Abdul Rahman Yaakub (SMK) Sedaya ngangkatka nama Kepala Menteri Ketiga enggau Gabenor Keempat didiri tebing Sungai Rajang.

Sekula nya didiri ba tanah seberai Pasar Kanowit entara menua Sibu enggau Kapit ba kandang menua tengah Sarawak.

Taja pia, sekula nya udah dipindah ngagai endur baru ba Jalai Nibong-Tada ngujungka sekula tu semak Sibu Jaya ari Pasar Kanowit.

Aku nesal amat laban enda meli lot ditu lebuh Unting nelai madahka mayuh lot deka ditumbuh ba kandang menua tu dalam kandang 20 taun ke deka datai.

NEMUAI KE SEKABAI

Anak lelaki Unting benama Doubline ngambi aku, dua pengajar lelaki enggau siku kerani indu ba sekula nepan perau panjai iya ti ngena enjin sepit Johnson 40 kuda (hp).

Apai iya ti ngembuan rumah banglo ba Sibu endang udah nganti penatai kami ba rumah panjai di Sedabai, ulu Sungai Pui.

Pejalai ngena perau ari sekula ngagai rumah panjai Sedabai nya urung sejam napatka jelatung sida.

Bendar tudah Doubline nyeliahka perau ditepan kami ngelantak apat kayu enggau kerangan ba sungai pemadu panjai laban sigi landik bebatak mudik Sungai Pui.

Lebuh sangkai ba jelatung, aku meda Unting sigi udah bediri chechegi ngambat penatai kami sebuat, ati sama gagit deka betemu.

Rumah panjai Sedabai ke bisi 28 pintu bilik nya endur Unting ada enggau besai. Menua asal ti chukup gah enggau pengada bala pemesai menua.

KENANG KAMI… Tawi (kiba) begambar enggau ex-Senator Joseph Unting Umang dalam taun 1999 ba Bandar Seri Begawan, Brunei Darussalam.

Lebuh beratika pemesai, peneguh enggau penegap tiang tebelian enggau gaya rumah panjai nya, aku endang nemu tu rumah panjai lama tang mengkang bediri tegap.

Taja pia, Unting berasai temegah enggau semua utai ba rumah panjai nya taja rumah panjai nya rumah panjai lama tang ba aku empu, tu mih pesaka tuai ke patut dijaga enggau diintu manah ungkup anak uchu ambu dudu hari.

“Niki ke rumah panjai kitu kaban, duduk ba ruai ditu,” pia ku Senator kemerah amat ngelaluka penatai enggau gaga ngambat kami sebuat lalu tama enda lama ke bilik.

Bala nembiak ti benung bemain, begagai ba ruai ngetu lalu bendar merening kami ti duduk ba rumah Unting nya tauka rindu meda siku indu bajik, Doris ti duduk sepiak aku.

ATI GAGIT

Doris aja indu ti nyempulang pejalai kami nemuai ke rumah panjai sida Unting lebuh nya, laban endang nadai mayuh kaban indu. Tambah mega iya siku orang ti rindu bejalai meda menua orang.

Bisi siku lelaki berapa kali mansa berandah, nadai nemu kebuah iya baka nya, engka deka nyeling tauka meda mua Doris ke bajik nya.

Bilik Unting nya ba tengah-tengah rumah panjai ngujungka kami sebuat ulih meda bilik ari setak kiba enggau kanan.

Aku meda bisi orang ke benung nyandik anak ba ruai dua pintu bilik kadap kiba bendar meda kami dia, nyangka nanya sapa kami ke duduk ba rumah tu.

Taja pia, bala indu bukai nadai dipeda ayan ba rumah, engka benung kiruh gawa ngintu ruang bilik tauka mela pemakai tengahari tu ungkup sida sebilik.

PENGIDUP RUMAH PANJAI

Ba rumah panjai nya, mayuh ukui ba luar rumah panjai nya enggau pekara tu ngasuh aku ingatka rumah panjai Kedap urung 20 taun ke udah.

Lebuh nemuai ngagai rumah panjai Unting tu, rumah panjai kami udah berubah ngagai rumah panjai moden ti digaga ngena semin lalu kerita paking ba mua rumah diri empu magang.

Nambahka nya, ukui mega enda dikemendar lepas enggau bebitau sebelah ruai rumah panjai. Pia mega jelu tupi ke bukai, sigi dikurung dalam kurungan tauka digagaka sangkar ba ujung bilik.

Ketegal ukui ditagang tama ngagai rumah panjai, peranak rumah panjai nganjung ukui ngagai kebun sida ti semak rumah panjai, semina dibai nurun ke tanah maya gawa enggau ngasu ke kampung.

Berapa pintu ari bilik sida Unting nya, aku tepedaka daun terup ngimbai kaki sida lalu Doubline begaut madahka daun terup nya kena petunggal iya bemain.

Pengawa betuie tu ukai semina dimain bansa Iban Kanowit tang main dikerindu raban bansa China, kena ngerindang hari enggau ngisi awak lepa.

Bakih aku madah, siku ex-Pemesai Pelilih benama Empeni Lang (diatu udah nadai) nyamai amat endur minta lisin betuie tu laban iya empu rinduka pengawa baka tu.

Siku ari pengajar benama Nelson (menyadi Sapit Kepala Menteri, Datuk Amar Douglas Uggah Embas) buntau malam nya lalu aku berasai lapar amat laban ngadang sida Unting sebilik deka ngenahka pemakai ti nyamai.

BASA NGAGAI TEMUAI

Siku apai tuai beumur 70-an ke enda madahka nama diri lalu nudukka diri ba ruai sida Unting seraya minching butul ai tuak.

Doubline ngangauka iya aki Igat, betanchut pandak sereta nadai bebaju ngujungka kami ulih meda sebelah punggung enggau tubuh iya penuh pantang.

Pia mega, kami tepedaka rekung iya mega bisi pantang lalu madahka pantang ba rekung nya pemadu pedis digaga tang nandaka pemerani sida ke lelaki.

Aku nguji meda jari enggau tunjuk iya engka bisi tepedaka pantang tegulun tang nadai ga meda.

Pantang tegulun ba jari enggau tunjuk nya ngayanka bujang berani kelia udah mujur bedengahka pala munsuh lebuh nurun ngayau munsuh.

Pemayuh ukir tegulun nya nunjukka pemayuh pala munsuh udah diulih bujang berani lebuh menua agi siga, bekayauka bala munsuh nandaka pemerani pungka lelaki.

Tang, sagam ati aku madahka Aki Igat ukai bujang berani laban nadai pantang enggau ukir tegulun dipeda ba jari iya. Engka iya amat berani sereta kering ari gaya langkar tubuh tang apin kala enggau orang basah jari.

Laban ati gagit amat deka nemu nama kebuah iya nadai pantang tegulun, aku lalu nanya Aki Igat empu.

Dia iya madah, iya kala enggau orang nurun beperang, tang lebuh nadai ba endur ti deka ditimbak, semua orang dalam rumah nya udah ngelarika diri ngujungka sida pulai nadai mai pala munsuh.

Bakih aku, Nelson enggau Aaron (diatu udah nyadi Kaban Parlimen Kanowit, Datuk Aaron Ago Dagang) bendar malik siku dara bajik ba rumah panjai nya.

Urung pukul 2 lemai, kami sebuat berasai gaga amat laban dinahka pemakai menua ke chukup nyamai iya nya kemiding, ikan sungai, manuk pansuh enggau salai kijang.

Pengudah tembu makai, kenyang endar asai, tudah perut diri nyau berupai tetining, kami lalu dibai duduk ke ruai baru laban Doubline madahka apai iya udah nyendiaka pemerindang ungkup sida lemai nya.

PEMERINDANG LEMAI

Sepiak bilik Unting, bala lelaki benung ngatur penuduk tawak ngambi ditabuh lagi seraya bala indu nabuh lapan engkerumung ti ditusun ari bunyi ke enda inggar ngagai inggar ngambika bunyi gendang nya manah didinga.

Sida lalu berengkah bemain gendang ajat nitihka tiun baruh. Udah nya, bisi siku dara bajik ti udah ngerasuh ngepan Iban lalu mantaika ajat indu lalu mantaika tanda ayun lundai.

Doubline meda aku nyau nyinuk meda gaya tanda ajat Iban nya lalu nelai aku nama indu ti ngajat nya tadi.

Udah nya, Aki Igat dipeda nyau bulih endar lemai nya laban udah mayuh ngirup tuak digulai Martel. Bisa diri tuak dibantai sida ke nunga kami lemai nya.

Aki Igat lalu ngerasukka ngepan ari gagung kulit remaung negung mua lubang, nangkin berangin pedang panjang, ngesan sempitan sumpit tapang lalu iya mega ngena lelanjang.

Aki Igat sigi landik amat ngajat, chukup sikar enggau chukup gerenik, rindu meda tanda dibantaika iya ti ngajat seraya megai enggau ngetup duku.

Udah nya, aki Igat lalu ngerasukka duku ke dalam sarung ke disangking ba punggung iya, udah nya engkechit nunda gaya bujang berani udah bedengahka pala munsuh.

Unting ngambi lelanjang ari pala Aki Igat lalu ditangkupka iya ba pala aku kelai ngasuh aku ngajat. Tu entara basa orang bempu rumah ngagai temuai, dibatak ngajat.

Aaron enggau Nelson mega sama dibatak ngajat malam nya sebedau kami mulaika diri ke bilik lalu hari siti kami mulaika diri ari rumah panjai nya.

PENGINGAT NEMUAI

Nya mih kenang pemadu berega enggau chukup manis kami sebuat lebuh penemuai ngagai rumah panjai Sedabai.

Ukai semina nya aja, pemanah enggau budi basa sida Unting serumah mega deka dikenang kami belama, seagi seput dikuan ba dada.

Pengiruh sida ari hari keterubah kami datai, ngambat ba jelatung enggau ngelaluka penatai kami enggau penuh basa nyentuk pementas ngintu pemakai.

Terima kasih ngagai sida Unting sebilik sereta sida serumah laban udah meri kenang manis ke deka dikeingatka kami belama.