ARTIKEL

Kenang pait manis PPgB Nazry Mohamat sekumbang gawa di Saratok

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

Pemedis enda tentu meretika leka jaku enggau budaya idup bansa Iban siti ari pemar sereta penanggul ditapi Pegawai Penguasa Bomba (PPgB) Nazry bin Mohamat, 36, lebuh terubah dianjung gawa ke Saratok kena 1 Mei 2017.

Asal ari Kampung Matang, Batu 10 Kuching, Nazry madahka taja amat peranak menua tu empu tang, lebuh datai di Saratok iya tetap ngasaika pekara baru lebih agi bekaul enggau daya idup maya begulai enggau mensia mayuh lebih agi pelilih Saratok endang pemadu mayuh diuan bansa Iban.

“Terubah aku datai ba Saratok, dia aku tekenyit meda majoriti Melayu ditu chukup landik bejaku Iban enggau pangan diri ukai semina enggau bala Iban tang mega enggau diri semenua.

“Ari nya, aku lalu berunding enda tau enda belajar jaku Iban ngambika nyamai berandau enggau mensia mayuh.

“Bepun ari nya, genap kali bisi program diatur Opis Bomba Saratok begulai enggau peranak ba rumah panjai dia aku nguna peluang nya dikena belajar jaku Iban.

NGIRI PENEMU…Nazry lebuh bejadika kelai program diatur begulai enggau Kaunsil Pelilih Saratok (MDS) ba sebuah rumah panjai di Empayang, Kabong.

UDAH PANDAI BEJAKU IBAN

“Puji Tuhan, pengelama empat taun udah gawa ditu, diatu aku mega udah nemu bejaku Iban sebaka enggau orang bukai,” ku iya madah ngagai Ruai, Sarawak.

Udah nya, maya ngelansa kenang bekaul enggau penyadi kes rumah angus sekumbang ngiring BBP pampang Saratok Nazry madah, dalam kandang nya nadai sebarang penusah angus besai nyadi ba genturung menua tauka pendiau lebih agi di rumah panjai.

“Tebal agi genap penusah ti nyadi sekumbang timpuh nya mujur dirara peranak menua nya kediri empu.

ENDA LEBU NGELATIH

“Tu mega sebengkah ari kenang manis ti deka semampai dikeingatka aku belama ke mega mandangka genap program diatur ngelama tu meri asil ti manah sereta enda lebu ngelatih meri sida penemu pasal pengawa bomba.

“Laban program bomba begulai enggau rayat ukai semina diatur ba rumah panjai tauka kampung tang mega dipejalaika ba opis-opis perintah enggau swasta di Saratok.

“Kelimpah Program 3K dikumbai ‘Keselamatan Kebakaran Kanak-Kanak’ ti ngujungka balai bomba enda pungkang tauka selalu ‘rami’ enggau penemuai ari raban nembiak sekula tadika sebedau penyadi Pandemik Covid-19.

“Baka nya mega enggau bala tuai raban bansa lebih agi bala tuai rumah panjai di Saratok endang seruran meri kerejasama ti manah ngagai bomba lebuh sesebengkah program bisi diatur ba rumah panjai tauka sitak baruh sida.

“Iya ke ngasuh aku berasai temegah iya nya bisi sekeda sida tu (tuai rumah) datai kediri empu ke balai minta program pemandang dipejalaika ba rumah sida.

KENANG…Nazry begambar pengingat bebala mayuh pengudah tembu program ngintu hari pengada nembiak benama Faqih ba mua balai bomba Saratok.

KEREJASAMA TUAI RABAN BANSA

“Meri terima kasih besai nuju semua tuai raban bansa di Saratok laban udah mantu, nyukung lalu meri kerejasama penuh dalam ngemujurka genap program diatur bomba sekumbang aku gawa di Saratok ngelama tu.

Enda ngira ba dini-dini alai, penguji enggau pemar lebuh gawa sigi bisi lalu di Saratok kami balat bendar betapi enggau penanggul nadai arus internet sereta telefon ba sesebengkah menua lebih agi lebuh bisi kes nyadi dimenua pesisir.

“Semua tu ditambah agi enggau jalai alun ti mit nyengkaum balat nangi lebuh deriba bebaika kereban pengangkut bomba nengah jematan ti udah repuk lalu tau runtuh sebarang maya.

“Pia mega, lebuh datai ngesah sebarang penusah ke Maludam tauka Beladin bekenaka feri dikena ngelayang ke seberai ari Pusa.

“Semua penekul baka tu ngujungka raban bomba enda ulih ngenataika diri enggau jampat ba palan penusah nyadi.

MAYUH PENGINGAT…Sekeda ari prgram ti kala dipejalaika raban bomba Saratok.

OPERASYEN PUNTAN

Pengingat pemadu pait diasaika aku sekumbang gawa di Saratok ditu iya nya maya puntan nyidi siku nembiak indu beumur belasan taun ti dipelabaka lemas di Kabong.

“Tu mih kengka iya lalu nyadi siti kenang pemadu pait sekumbang ngereja pemgawa di Saratok ti semampai dikenang aku belama iya.

“Seruran berasai enda tepantup ati maya nya laban enda mujur tesidika tudah.

“Tang nadai daya nyangka udah iya diatur petara lalu nyentuk sehari tu nembiak nya nadai temu berita ke mega nadai siku orang nemu nama utai kebendar nyadi,” ku iya ngelansa kenang maya bejalaika operasyen ngiga enggau nyelamat siku nembiak dipelabaka lemas ba Sungai Kabong.

Taja pia, bisi pengingat manis deka dikunsika aku iya nya lebuh penatai aku diterima komuniti ditu enggau manah.

“Empat taun lima bulan di Saratok, mayuh pekara dipelajar lalu iyaka pemadu dikeingat sereta nyadi sebengkah ari kenang manis iya nya lebuh ngasaika pemanah basa orang Iban ditu lebuh nyambut penatai temuai bisi datai ba rumah panjai sida.

“Aku mega mujur bebakih sereta bekelala enggau semua orang enggau enda ngira pengarap dipegai siku-siku.

“Lalu tebal sida tu nyadi pangan ‘rapat’ aku nyentuk ke sehari tu.

“Tu nyengkaum pengingat maya begulai enggau raban tim main bol dikumbai Merantau FC,” ku iya.

ARATERUS MUJUR…Nazry meri basa kepenudi ngagai bala staf baruh iya sebedau mindah gawa ke Siburan.

Pia mega seruran dikenang aku pasal Program Ngintu Hari Pengada ungkup nembiak mit (Tadika) ba balai.

“Tu beduduk ari sukung apai indai nembiak ti chukup rinduka pengawa nyadi bomba.

“Aku meransang semua bala Chairman Bomba Komuniti iya ke udah ditumbuhka sebedau tu terus chakah ngereja pengawa ungkup pemaik semua.

“Terima kasih mega nuju semua peranak di pelilih Saratok nyengkaum ari Roban enggau Kabong laban udah meri kerejasama ke chukup manah ngagai opis bomba Saratok.

“Pia mega arapka penemu diulih maya nyereta sesebengkah program diatur ngelamatu diguna enggau manah ambika penusah angus mujur diseliah,” ku iya.

Berebak enggau nya, Ruai Suara Sarawak mega meri beterima kasih ngagai kerejasama ti udah diberi Nazry laban nadai kala lembau lebuh dipinta meri timbal penemu tauka penerang ke beguna ari operasyen digaga Balai Bomba Saratok.

BERITA LAIN

BERITA TERBARU

PM Thailand disahkan positif COVID-19

BANGKOK, Thailand: Perdana Menteri Thailand, Srettha Thavisin, mengesahkan semalam bahawa beliau positif COVID-19. Srettha mengumumkan di akaun rasmi X miliknya bahawa beliau akan mengambil cuti

Tulisan beracun

MATA pena lebih tajam daripada mata pisau. Sama seperti pisau yang dapat digunakan untuk mengukir, alat yang sama juga dapat digunakan untuk membunuh. Pisau dapat

Zii Jia juara Terbuka Australia

KUALA LUMPUR: Pemain perseorangan lelaki profesional negara, Lee Zii Jia meraih gelaran kedua musim ini selepas  merangkul kejuaraan Terbuka Australia 2024 dengan menewaskan wakil Jepun