PENGUDAH tembu ngambi peresa Sijil Pelajaran Malaysia (SPM) udah tentu bala nembiak kelebih agi nembiak lelaki berengkah ngiga penerang pasal pengawa puang ti dibuka perintah.

Engka bisi, bala nembiak ti rindu nyadi pengajar, indu misi, polis, bomba, kerani enggau sekeda pengawa bukai ti ulih nambahka penatai pemisi.

Naka ulih meh kitai ngatur jalai pengidup diri ngambi ulih nyadi mensia ti menyana lalu ulih ngidupka diri.

Tambah mega, diatu bemacham peluang disedia ungkup bala nembiak sekali ke sida milih terus gawa tauka agi deka ngiga penemu enggau nampung pelajar ngagai tikas tinggi.

Bisi mega sekeda nembiak enggai gawa dalam sektor perintah, sida nyamai agi gawa enggau kompeni nyadi akauntan, injinir, eksekutif, menijar, supervisor enggau ke bukai.

Sekeda nembiak engka milih jalai kediri baka numbuhka dagang, nyadi penanyi, betanam sayur tauka bekebun, nanam sawit, muka kedai enggau ke bukai.

NGATUR PENGIDUP

Enda tinggal mega, bala nembiak ti deka nampung sekula ngagai palan pelajar tinggi ngambi Degree, tama ngambi kus vokasional, ngambi diploma enggau kus bukai ti bekaul.

Semua tu endang peluang bala nembiak napi ubah pengidup ti majak mar kelimpah ngajar sida reti ngatika diri maya udah besai.

Sebengkah pengawa ti pemadu dikerindu nembiak pengudah tembu sekula Pom Lima iya nya nyadi soldadu.

Taja nyadi soldadu tu bisi mayuh bansa baka soldadu langit, soldadu tasik enggau soldadu darat.

Tang bisi nembiak nya nguji ngisi ngapa, asal meh ulih diterima nyadi soldadu.

Nyema kitai beratika sida nembiak ti ngisi pom maya deka nyadi soladu tu, sida suah ngemeratka pekara pasal pemerat tubuh enggau peninggi.

Sida mega deka diperati ari sukut panjai depa lengan, pisin buk, langkar kaki enggau pekara bukai ti besangkut paut enggau raras tubuh.

Kebuah pia, laban penteba tu entara atur pemadu beguna maya intebiu nyadi soldadu.

Jarang kitai meda sida ngiga penemu pasal pengawa soldadu ti engkeman, unit soldadu, pasal kereban ti dikena soldadu enggau pekara bukai ti bekaul pasal pengawa nyadi soldadu.

UNIT PARA ATM

Nya alai, ke sekali tu, Suara Sarawak mai pemacha nyerungkai sebengkah unit khas ti bisi dalam pengawa nyadi soldadu, ngambika nembiak rebak baru diatu ngembuan penerang sereta penemu sebedau minta pengawa nyadi soldadu.

Kala ninga pasal sebengkah unit dalam Soldadu Darat Malaysia (ATM) ti dikumbai Renjer Unit Payung Terejun (Para ATM) kini kitai semua?

Pelaba aku, enda mayuh bala kitai nemu pasal Unit Para ATM tu, laban unit tu sebuah unit elit ti mar.

Lalu ukai semua renjer dalam ATM mujur datai enggau nyapai tikas unit khas tu.

Unit Para ATM sebengkah unit ti nerima latih khas ngena payung terejun lebuh bejalaika operasyen tauka raban ti dianjung nguna payung terejun dikena ngetan enggau nyaga sesebengkah palan.

Sida tu kadang enda ditemu munsuh laban palan sida tu terejun nitihka gaya rampa menua ti likun sereta mar ditemu.

Sekeda turai sejarah lama lebuh operasyen nguna payung terejun ti mujur kelia iya nya kena 10 Februari 1941 lebuh serang keterubah ngaul 38 iku soldadu payung terejun British dikumbai ‘X’ Trup ari Lumur 2 Komando nyerang lalu ngalah ke munsuh ‘akueduk’ di Tragano, Itali.

TURAI SEJARAH

Udah nya, operasyen ti sebaka kala dipejalai lebuh ‘Ops Torch’ di Afrika Utara, Ops Husky, Sicily (1943), Ops Overlord: D-Day (1944), di Selantan Perancis (1944), Ops Market-Garden.

Bisi mega Operasyen Varsity: Neresa Sungai Rhine, di New Guinea, di Burma, rambau Perang Korea, Ops Musketeer Krisis Suez, Perang Indo-Pakistan 1965 (Perang Kashmir Ke-2), Perang Indo-Pakistani 1971, Perang Vietnam enggau Operasyen Cactus (1988).

Ba Malaysia, Unit Para ATM tu berengkah ditumbuh ba taun 1970 lalu ngembuan tanggungpengawa khas kelebih agi nagang penatai penyelawai.

Sekeda turai sejarah lama ti kala ngena unit tu lebuh menua agi sigau kelia.

Baka Ops Pasir ngelaban penyelawai ari Filipina di Sabah ba taun 2000 enggau Operasyen Astute ngelaban penyelawai di Timor Leste ba taun 2006.

Kelimpah ari nya, unit sida tu mega kala ngulu operasyen bukai baka Malaysian Medical Team (MASMEDTIM) Chaman di Pakistan, MASMEDTIM di Kashmir, MASMEDTIM di Acheh, Indonesia.

Bisi mega MALCON – UNIFIL 2007-2013 di Lubnan, insiden Genting Sempah (2007) enggau Gerila Sulu di Kampung Tanduo Lahad Datu Sabah (Ops Daulat) ba taun 2013.

SOLDADU UNIT PARA ATM

Siku peranak bansa Iban asal ari menua Saratok entara bujang berani ti mujur tama dalam Unit Para ATM berengkah ari pemujur iya nyadi siku soldadu kenyau ari taun 2006.

Sarjan Greg Munji Kubal, 37, udah gawa nyadi soladu sepengelama 17 taun ke alai diatu iya benung gawa di Melaka.

Ngembuan tubuh ti chukup tinggi, gumpal isi, regas sereta berani, nyadi pengelebih ngagai Greg tama dalam unit tu kelimpah penau ti luas dalam bidang nyaga pengelikun.

Apai tiga iku anak tu madah, pengelama 17 taun udah nyadi bujang berani, iya ngasai ke pengawa tu chukup berega sereta dipebasa.

“Aku nyadi soldadu laban minat, pengerindu enggau pengeransing ngiri penemu laban sayau ke menua sereta deka nyaga pengelikun menua.

“Pemujur pejalai aku nyadi siku ari raban soldadu tu berengkah ba taun 2006.

“Udah nya aku lalu dipilih tama dalam sebuah tim khas dikena nyaga pengelikun menua iya nya Unit Para ATM,” ku iya ngepunka randau.

Ku Sarjan Greg nusi, sida deka nyadi tim pemadu dulu dikangau nyaga pengelikun menua nyema bisi penusah ti ngeruga pengelikun ba dalam enggau luar menua nyadi, kelebih agi ngaul raban penyelawai.

Ketegal sekeda penerang ti enda ulih dikunsi ngagai mensia mayuh tauka dikumbai penerang resia, Sarjan Greg enda ulih nerang enggau silik pasal penusah ti kala ditempuh iya sekumbang udah masuk unit elit tu.

PENELEBA BEREGA

Taja pia, iya madahka diri chukup temegah enti pengawa tauka operasyen khas sida mujur ditembuka maya nyaga menua.

“Nyema bisi pengawa khas, aku nyau jauh ari kami sebilik, ninggalka bini anak ngujungka sida nyau ngatika diri.

“Kebuah pia laban sekeda pengawa tu dikereja ukai sehari dua tang datai beminggu enggau bebulan.

“Taja pia, aku tepantup ati lebuh pengawa ti diberi nya mujur sereta ngemegah menua nyengkaum mujur ngidupka nyawa.

“Ba aku, peneleba tu chukup berega seraya peluang ngagai aku ngiri penemu diri, kelebih agi lebuh gawa ba menua jauh,” ku iya.

Sarjan Greg madahka diri berasai gaga laban pengawa iya dalam unit nya diterima sida sebilik baka apai indai, bala menyadi, bini enggau bala anak.

“Sida seruran nyukung lalu besampi ngagai Tuhan ngembing sereta ngelindung aku lebuh bejalaika pengawa.

“Bini enggau bala anak mega seruran nyukung sereta enda ngetu besampi ke aku.

“Nya ti nyadi peransang aku ransing agi gawa taja pen kami nemu kadang pengawa tu nyau berambunka nyawa,” ku iya.

Lebuh ditanya pasal pengawa enggau operasyen ti pemadu nyulut kala dijapai iya, Sarjan Greg madahka diri kala ngaul diri ba pengawa lumba.

Lebih manis, iya mega kala bulih anugerah atlit pemadu nyulut ba ATM.

“Kelimpah ari nya, aku mega diberi peluang ngulu misyen khas UNIFIL 2016-2017 di Lubnan.

“Semua peneleba nya nyadi turai sejarah ba pengidup aku kelebih agi dalam Unit Para ATM,” ku iya.

SAYAU KE MENUA

Nangkan nya, iya ngelalau nembiak rebak baru mereti lalu betati pemesai reti ‘kemerdekaan’.

“Rayat mesti bebasaka ejensi uniform laban sida tu ejensi ti nyaga pengelikun menua.

“Aku besampi ngarapka diri empu terus mujur ba pengawa tu nyentuk pinchin ila.

“Ngagai nembiak rebak baru kelebih agi sida ti udah tembu SPM ti bisi ati deka nyadi soldadu teruska pengeran ati kita ngambi raban pelapis dalam unit khas tu bisi belama,” ku iya.

Iya mega meransang nembiak bansa Iban bukai ngambi ulih nitihka singkang bansa bukai dikena napi ubah pemansang dunya.

Ba pengujung randau, Sarjan Greg mega meransang nembiak rebak biak anang mudah mantul ati ba pengidup seagi enda tepantup ba bandir.