KUCHING: Penebah sape tebilang, Alena Murang udah ngelancharka eksibisyen seni keterubah iya ba Galeri Hoan, palan besai bebelika barang La Promenade ditu kemari.
Bisi 51 koleksyen dero ti diasil pengelama 10 taun udah dipandang ba galeri nya sereta nerima mayuh peminat seni ti datai tumu pukul 7 malam.
Alena bulih buah runding ngatur eksibisyen ba galeri nya ari Vincent Van Gogh, penero ti dikerindu iya kenyau ari sekula suba.
Koleksyen dero nya asil ari buah runding bekaul budaya Kelabit, randau enggau ibu iya, pengerindu ba muzik sereta seni nya empu.
Entara asil dero dikerindu Alena nya Pu’Ayam ti bisi besangkut paut enggau jalai pengidup nembiak mit ba menua sida.
Alena ngena dawat, kapu, akrilik, chat ai, kanvas, keretas, rikoding audio enggau abus ari rumah panjai.
NGASUH RINDANG
Lebuh dirandau pemberita, Alena madahka diri nyau berunding deka nero baru pengudah beputung ti ngujung ke iya enda ulih bejalai enggau gawa.
Ketegal penekul nya, iya madahka diri berengkah nero baru dikena ngisi awak lepa.
Alena madah, nero nya ngasuh iya besemangat nyentuk ngaga pemutus badu gawa korporat ba Kuala Lumpur sebedau ngulu kus seni pengelama 10 bulan.
Ngelansa pasal eksibisyen iya ba Galeri Hoan, Alena madahka iya nerima kangau ari pengari galeri nya lalu udah berandau pasal atur eksibisyen kira setaun ti udah.
“Aku ngasaika diri agi mansang nyadi artis, aku ukai berunding ke diri biak tang aku ngasai ke diri artis biak.
“Ngelama tu, aku mayuh ngena awak diri ba pengawa muzik, ari nya tadi mayuh pekara baru diserungkai enggau dipelajar aku ba dunya seni,” ku Alena tuchum.
Sama datai pengempu Galeri Hoan, Hoan Kee Huang enggau Presiden Gerempung Seniman Sarawak David Chew.
