KUCHING: Penanggul makai dadah enggau perengka enda dikemendar nyadi siti penanggul dunya ti patut diputar begulai sereta meruan laban penanggul nya meraka adan menua enda ngira bansa, penempa enggau status ekonomi rama.
Sapit Premier Sarawak, Datuk Amar Awang Tengah Ali Hasan madah, semua kaban Pelin Atur Komiti Sekali Ngetu (OSC) kelebih agi Gerempung Mutar Isu Dadah enggau Perengka Enda Dikemendar (MIDS) patut chakah agi mutar isu nya.
“Nya kebuah, kaban OSC patut nyukung pengawa ngubat sereta nyuman sebarang ruang bilik ti ngaul pengawa makai dadah enggau perengka enda dikemendar ba sitak sida empu,” ku iya.
Awang Tengah mansutka jaku nya rambau Pengerami Malam Gala Anugerah Pheonix beserimbai Simposium Pengawa Nyuman Antarabansa (IRS) 2023 ba Hotel Imperial ditu, malam kemari.
Iya madah, pangku pengawa bala pakar, pengereja pengawa rama enggau tuai komuniti ba pengawa ngurangka peminta dadah ukai semina nyadi tanggungpengawa rasmi aja tang nyadi pangku pengawa pengasih ngagai mensia.
Ku iya, Sarawak ngerikod peratus residivisme pemadu baruh ba Malaysia iya nya 0.88 peratus lalu tikas ngejil iya nya 95 orang jil ungkup genap 100,000 peranak ditu.
“Nisbah pengawa ngiga bantu ba raban ti nerima empas ari pengawa makai dadah nya majak manah agi iya nya 1.10 ba taun 2018 enggau 1.6 naka bulan Julai 2022.
“Tu siti penyulut besai ti mandangka Sarawak berindik ba arung ti engkeman ba pengawa mutar penanggul makai dadah enggau perengka enda dikemendar,” ku iya.
