KUCHING: Lambar Didik dalam surat kabar Suara Sarawak meri mayuh pengelebih ngagai bala nembiak kelebih agi dikena nyikap diri sebedau napi peresa besai perintah.
Menijar Besai Opis Vertikal Pelajar NSTP, Farah Ezrin Mohd Rashidi madahka Didik tu bisi pengelebih kediri ti diguna nembiak ba pelajar sida.
“Berita Harian Didik udah bisi kenyau taun 2001. Pengudah manggai 18 taun dichelak, piak kami bisi kaul rat enggau bala pengajar sereta organisasyen pelajar menua tu.
“Kaul rat ke ditanggam tu deka ngemuntangka agi bala nembiak ngulihka penemu tambah ba pelajar sida.
“Produk tu bisi pengelain kediri empu. Kebuah pia, lambar Didik enda dikeluar semina setaun sekali tang deka dikeluar ninting minggu nitihka kerejasama enggau piak surat kabar.
“Nya kebuah, produk tu dikeluar beminggu, sebarang ubah ulih ditukar lalu utai dipelajar deka ngasi nentuka bala nembiak ulih nambahka penemu nengah lambar nya,” terang Farah lebuh dirandau Suara Sarawak ditu, tadi.
