KUCHING: Opis Menteri Pengawa Bekebun enggau Komoditi (KPK) deka terus chakah nanggam kerejasama entara ejensi dikena matak minat raban nembiak ngaul diri ba sektor ladang nyengkaum pengawa dagang dikena ngurangka pengawa bepanggai ngagai pengereja menua luar.
Sapit Menteri Besai ke mega Menteri nya, Datuk Sri Fadillah Yusof madah, nya meri peluang ngagai raban nembiak bulih peluang latih pengelandik enggau peluang gawa ba sektor ladang.
“KPK udah nanggam kerejasama enggau bemacham opis menteri enggau ejensi sereta raban peribit dikena matak minat nembiak ngaul diri ba sektor ladang.
“Tu nyengkaum kerejasama enggau Opis Menteri Pengereja Pengawa nengah Opis Pemansang Pengelandik (JPK) dikena nempa Modul Latih TVET sektor ladang, Opis Menteri Pelajar Tinggi (KPT) ngambi bejalaika program ngansah pengelandik enggau pengelandik baru graduet sereta latih industri,” terang iya
Kaban Parlimen Petra Jaya mansutka jaku nya lebuh nyaut tanya ba Aum Parlimen di Kuala Lumpur, ditu tadi.
Ngelansa silik ku iya, KPK mega nanggam kerejasaam enggau sektor peribit kelebih agi pemain industri besai baka Sime Darby Plantation, FGV, IOI Plantation enggau Yayasan Pahang Plantation Holding (YPPH).
