Kerejasama HUGS Project dipun ari pengasih

“Mimit tulung tua, besai mih reti ba orang bukai.”

Tibak jaku tu datai ari pengeran siku penyanyi Iban, Depha (Masterpiece) teulihka runding ngepunka pengawa dikumbai Tabung Covid Depha Masterpiece.

Ku Depha, pengawa iya nerima sukung manah enggau kerejasama ari Tabung Susu Dan Kemanusiaan Bumi Kenyalang ti digelar sida HUGS Project, orang ti ngembuan juluk enggau tuju ke sama.

Iya madah, sida sebuat ngembuan ati chukup sinu enggau kasih kelebih agi ruang bilik ke bisi anak mit sekumbang Atur Tagang Pejalai (PKP).

Pemanah ulah ti keran mantu raban diselinting enggau anak ba selampur menua tu patut amat ditunda enggau nyadi teladan ba pengidup kitai besehari sehari.

Pengawa mantu orang bukai tu endang sebagi ari pengawa ke patut dikereja sereta kelai kitai siru enggau kasihka sida ke napi penyuntuk ba pengidup.

SAMA BESAUP… Aliff nyuaka bantu ngagai peranak ti suntuk pemakai ba menua tu.

JAKU TESAU

Berindik ari pengeran deka mantu raban diselinting kelebih agi ruang bilik ti bisi anak mit, Depha Masterpiece bisi nganjung penerang pasal bantu nya nengah akaun Facebook iya.

Ba penerang ba Facebook nya, iya madahka diri deka mantu orang ti suntuk kelebih agi bala anak mit ke abis tusu enggau lampin ketegal penusah besai ditapi kitai diatu.

“10 April tu tadi pengudah aku madah deka mantu sida ke suntuk pemakai kelebih agi bala anak mit, tang aku enda nyangka mayuh orang bekunsika penerang aku nengah Facebook.

“Keterubah iya aku sigi deka mantu sida ngena belanja ari kuchik agi empu kelebih agi sida ti suntuk pemakai enggau ruang bilik ke bisi anak mit laban aku siruka sida nadai susu enggau lampin dikena.

Ukai semina nya aja, pengawa dikereja Depha tu nerima timbal ke chukup manah lalu mayuh orang muji penyiru sereta pengiruh iya ngagai raban diselinting kelebih agi sekumbang PKP tu.

NYAUP SEMUA… Ardilla nganjung bantu pemakai, tusu enggau lampin ngagai ruang bilik ti bisi anak mit.

“Aku enda nyangka mayuh orang bekunsika penerang dibantai aku nengah Facebook tu lalu aku nerima mayuh pesan ari bala mayuh minta saup ari sukut bantu pemakai.

“Mayuh orang minta saup kelebih agi apai indai ke nadai kereja sekumbang PKP tu laban tusu anak sida udah abis enggau bisi sekeda ngiruh teh aja.

“Sinu amat ninga sebana bala apai indai ke nadai kereja ngujungka aku keran deka mantu sida enggau naka ulih ngambika sida badu tusah sereta irauka penyuntuk diasaika diatu.

“Mimit sama mimit ngambi kitai sama enda lapar sekumbang PKP tu,” pia ku Depha sereta jaku iya nya ngayanka penyiru ngagai mensia mayuh ke napi penanggul jam ke diatu.

NERIMA SUKUNG

KASIH… Entara penerima bantu susu enggau lampin.

Pengudah berita pasal iya deka mantu orang ti tusah ngerembai sebelah media rama, ngujungka bisi piak bukai deka ngaul kerejasama berengkah Hari Tiga tu tadi ngambi pengawa pengasih iya tu mujur agi.

Berindik ari nya, Depha lalu numbuhka Wang Turu Covid Depha ngambi ulih mantu mayuh agi orang ti napi penanggul sekumbang PKP tu.

Ngelansa sentang sida ke nerima bantu, Depha madahka sida nyaup sida ke diau ba Sibu, Sarikei, Miri, Kuching enggau endur bukai.

Terang DEpha, sida sebuat deka ngerembai agi pengawa nganjung bantu ba selampur menua ngambika penusah sida ke tusah tu semampai dikenati.

JULUK ATI TEJAPAI

Ku Depha, naka diatu iya udah mantu 25 ruang bilik kenyau tiga hari iya udah ngepunka Wang Turu Covid Depha tu enggau lebih ari 100 peminta minta bantu baka tu.

Nambahka nya ku iya, mensia mayuh mega bisi nyuaka belanja dikena nyaup aku ngemujurka pengawa pengasih kelai nyukung pengawa pengasih iya.

“Mensia mayuh enggau raban Serakup Pemuzik Dayak mega bisi nyuaka belanja kelai sukung sida ba pengawa aku tu.

Ngelansa sentang kerejasama, Depha madahka HUGS PROJECT tu gempung ti bekerejasama entara Wang Turu Covid Depha, Tabung Susu & Kemanusiaan Bumi Kenyalang enggau Hikmah Bagi Menua Kuching.

“Tabung Susu &Kemanusiaan Bumi Kenyalang udah meri sukung tegut ba pengawa aku tu kelebih agi ba pengawa nganjung bantu susu enggau pemakai lalu semua pengawa tu dikereja kami empu baka meli enggau nganjung bantu ngagai sida ke suntuk pemakai tu,” terang iya silik agi.

Nambahka nya, Depha madahka sida mega bisi nyadung bantu bukai baka berau, minyak sumai, lauk, telu enggau ke bukai ungkup sida ti begunaka bantu tu.

Entara gempung HUGS Project tu iya nya Depha Masterpice (Wang Turu Covid Depha) lalu disereta Aliffsuhaimi Suhaili enggau Nur Ardilla Abd Kadir ari Tabung Susu & Kemanusiaan Bumi Kenyalang, Sepian Abg Daun ari HIKMAH Kuching sereta raban HUGS Project ke bukai.

“Tuju kami numbuhka gempung tu laban deka mantu raban diselinting enggau sida ke dituntung penusah sekumbang PKP tu kelimpah makin mayuh bala bukai udah geraj jari meri belanja ngagai kami,” ku Depha.

“Terima nuju kita ke bisi nyaup kami ari sukut mata duit enggau sukung semua kelebih agi Pengajar Matt Pyan, Laili Basir, Vee, Khairul Erel, Mathew Changat, Dawie Tamang Raja, Serakup Pemuzik Dayak enggau bala bukai.

SAUP KAMI

Nya alai, aku ngarapka HUGS Project tu deka bulih mayuh agi saup ari orang ngatika diri enggau mega ejensi ukai dikuasa perintah (NGO) ke bekaul ngambika kami ulih nampung pengawa mantu raban ti tusah sekumbang PKP tu.

Ku iya, sida ke tusah jam diatu begunaka bantu kitai ngambi sida enda ngasaika penyuntuk ari sukut pemakai enggau barang dapur kelimpah bala anak mit chukup pemakai enggau utai bukai baka susu enggau lampin.

Penerang silik tauka tanya bukai bekaul bantu tu tau terus Whatsapp tauka telefon ngagai Aleef ba lumur 0147898388 tauka Ardilla ba lumur 0165225153 tauka anjung pesan ngagai Facebook, Depha Masterpiece lalu padah ‘Tabung Covid Depha’.

Suara Sarawak