KUALA LUMPUR: Opis Wang Turu Pelajar Tinggi Nasional (PTPTN) kemari nyain sempekat pemereti ati (MoU) enggau tiga ejensi dikena mantu peminjau bulih kereja pengudah graduet.
Tiga ejensi tu iya nya Balai Dagang enggau Industri Nasional Malaysia (NCCIM), Ejensi Kereja JobStreet.com Sdn Bhd enggau Opis Pengereja Pengawa Semenanjung Malaysia.
Chairman PTPTN Wan Saiful Wan Jan madahka nyadi raban meri pinjau pelajar, beratika penanggul ditapi sida ti napi pemar ngiga kereja bela diasaika PTPTN.
“PTPTN meretika penanggul ditapi sida ti minjau, nya alai pengawa tu dipejalai nengah tanggungpengawa rama korporat (CSR) ngambi ulih mantu mutarka penanggul tu,” ku iya.
Iya mansutka jaku tu ngagai pemberita pengudah pengawa besilih MoU entara PTPTN enggau ketetiga ejensi nya ditu tadi, bela dikemata Menteri Wang Lim Guan Eng.
“Tu di luar bidang kuasa enggau pangku pengawa PTPTN tang chara tu dipejalai nyadi sebagi ari pengawa PTPTN mantu peminjau ngiga kereja enggau ngemuntang pengawa sida mayar pinjau pengudah tembu belajar,” ku iya nerang.
Ku iya, kerejasama nengah MoU tu deka nambahka penyampau bayar pinjau nentuka rebak dudi sereta disadang meri pemaik sejuta peminjau bukai.
Wan Saiful madahka kerejasama tu mega dikearap mantu peminjau PTPTN sebedau tu (berengkah ari taun 1997) enti sema sida agi nadai batang pengawa tauka deka ngiga kereja menyana agi.
Kerejasama tu dikearap mantu peminjau ti nyentuk diatu nadai tebayarka pinjau sida tauka enda ulih mayar enggau meruan, meri sida awak ngiga kereja entap agi, ku iya.
