Keresa lama nyadi produk dagang

“Aku berengkah nyual keresa lama nya ba di Pasar Seni, Pasar Ampar enggau endur bukai laban udah kelalu mayuh ba rumah.”

KUCHING: Pemuas ke ngumpul barang lama tauka keresa lama baka jam lama berega RM300, ngujungka siku lelaki menua tu nukar minat nya nyadi pengawa dagang.

Tauke Henrysem Collection Vintage Watches & Antique Henry Semui Ben madahka iya rindu ngumpul keresa lama ti mar digiga ba jeman diatu.

“Keresa lama tu nyengkaum jam lama, temaga, keresa ke mar digiga baka pelita, mesin jait, kipas, seterika lama enggau keresa lama bukai.

“Aku berengkah ngumpul keresa lama kenyau taun 1995 lalu ngumpul jam vintage berega RM300, miki jam enggau ngena jam nya diatu,” ku iya lebuh dirandau pemberita lebuh Merdeka Nite’ 19 Pasar Ampar, 31 Ogos tu tadi.

KERESA LAMA… Henry Semui angkun nyimpan keresa lama ngambi dipandang ngagai mensia mayuh lalu semua keresa nya ngembuan sejarah. Gambar- Nurul Fadzlyn Zamury

Nambahka nya ku iya, ari jam nya iya berengkah ngumpul keresa bukai taja kekadang rega keresa lama nya mar.

“Aku berengkah nyual keresa lama nya ba di Pasar Seni, Pasar Ampar enggau endur bukai laban udah kelalu mayuh ba rumah.

“Mensia mayuh kelebih agi peranak ba kampung anang muai keresa lama baka typewriter, lampu lama laban barang nya mar digiga,” ku iya nangkan.

Henry madahka keresa lama ke bisi dijual iya tu datai ari semua serap komuniti laban dijual ngagai semua ti rinduka keresa nya.

“Sida ti beumur 50 ngagai 70 taun suah dipeda rindu meli jam lama nya.

“Bala bini orang suah meli dapur lama, dapur semawar, dapur minyak tanah enggau mega sida ti rindu ngumpul perengka tu,” ku Henry.

Barang berega bukai ke bisi dijual iya baka talam temaga ari Serikin nyentuk bisi orang meri chek puang ngagai iya laban deka meli talam enda ngira penyampau rega ke diletak iya.

“Diatu aku enda nyual talam nya laban semina dikena mandang ngagai mensia mayuh aja.

“Naka tu, aku bisi 200 jam lama, 80 keresa lama ke bukai lalu sekeda udah dijual,” ku iya nerang.

Iya meli keresa lama nya ari kedai ngena baru, kampung, kedai besi buruk enggau endur bukai.

“Aku deka nentuka barang tu berega enggau nyelai lalu aku nyual baru ngagai sida ti rinduka keresa lama tu.

“Bisi barang ke dijual aku tu berega RM50 lalu bisi mega manggai beribu ringgit,” ku iya nerang silik.

Henry Semui

Suara Sarawak