Kerita ensayar, melaki bini bebadi nyawa

KUCHING: Melaki bini bebadi nyawa ba penusah bebadi ba jalai alun di Jalai Astana ditu urung pukul 5.50 pagi tadi.

Penusah dipelaba nyadi lebuh kerita ditepan niang Recco Juiem, 34 taun, enggau bini iya, Salome Michael Abang, 35 taun, ensayar ke jalai sepiak ngujungka ngelantak sebuah kerita bukai datai ari Kuching.

Ketuai Opis Pansik enggau Penerit Adat Trafik Sarawak, Superintendan Alexson Naga Chabu madahka sida nerima ripot pasal penusah nya urung pukul 6.45 pagi sebedau nganjung dua pemesai ngesah ngagai endur penusah nyadi.

“Asil pansik, sebuah kerita dipadah nengah jalai lurus ari Kuching ke Jalai Astana belantak enggau sebuah kerita Perodua Kancil ti ngenyit ensayar ngagai jalai sepiak.

“Deriba enggau orang ti nepan kerita Kancil nya balat bakal ba pala parai tekala nya ba penusah nyadi seraya deriba enggau dua iku ke bukai nepan sebuah agi kerita nadai sebarang bakal,” ku iya ba penerang tadi.

Ku iya, bangkai seduai nya udah dibai ngagai Rumah Orang Mati Sepital Besai Sarawak (HUS) ngambika dipansik.

Ku Alexson, kes nya agi dipansik di baruh Seksyen 41(1) Akta Pengangkutan Jalan 1987.

BEBADI NYAWA… Mua kerita ditepan niang Recco enggau bini iya, anchur.