Kes Bill Kayong: Kort nulak apil Mohd Fitri

KUCHING: Kort Apil kena 17 Februari tu tadi udah ngenukuka penyalah enggau ukum Mohd Fitri Pauzi ba kes munuh niang Bill Kayong ti parai ditimbak kena 21 June 2016 suba.

Lawyer Kamek For Change (LK4C), Murnie Hidayah Anuar madah, nyauka dua jam endur piak kort meri jaku putus pasal apil Mohd Fitri, urung pukul 5.55 lemai, Hari Satu nyin tadi.

“Kort udah nulak apil Mohd Fitri laban nadai pengandal ke jaku enggau bukti sebedau tu bepelasarka piak ngempu dawa lalu pekara tu diterima Akim ngatur pechara dalam prosiding Kort Tinggi.

“Bisi pekara ngasuh enda arapka bukti dibantaika Mohd Fitri nyengkaum timpuh jam, chunto DNA enggau sengkabung mua sereta saksi PW20 Jambai Jali,” ku iya nengah sebengkah penerang, pagi tadi.

Iya mega nerang, tiga iku orang bukai ke disangka iya nya Stephen Lee Chee Kiang, Lie Chang Loon enggau Chin Wui Chung ti dilepas ba renggat prima facie kena 6 June 2017 mega patut beempu tanggungpengawa kes munuh tu.

“Kes tu nyata enda diatur ngena chara betul ke alai mayuh saksi nitihka pematut dikangau enda ngenataika diri nyentukka kes didawa enggau barang bukti enda dibantai ba mua akim ti becharaka kes nya.

“Siti pekara ti nyata pasal kes tu iya nya charutka Tanah Adat Bansa Asal (NCR) di Sungai Bekelit, Bekenu ti diketuaika Bill Kayong ngaul Ladang Tung Huat ti dibaruh pegai Direktor iya, Stephen Lee,” ku Murnie.

Kenu ku iya, piak polis enggau pendawa puntan ngumpul bukti ti chukup ngagai ketetiga ke disangka laban nadai nerima pemendar ari sekeda piak.

“Kami dipadah, piak pedawa enda ulih ngenataika Notis Apil ngagai sida tiga disangka nya ti dilepas sereta ngujungka nadai ulih diapil agi.

“Ba kami, pekara tu balat ngemaruhka sistem keadilan menua lalu deka nentuka piak Luyar Menua berati enggau muka baru kes sida tiga disangka tu ti agi lepas,” ku iya madah nyemetak.

Suara Sarawak