MIRI: Siku lelaki digiga polis kenyau ari enam taun ke udah bekaul kes munuh Sekreatari Parti Keadilan Rakyat (PKR), Bill Kayong mujur ditangkap sehari tu.
Tuai Polis Pelilih Miri Asisten Komisioner Hakemal Hawari madahka saspek benama Koong Siang Ming@ Batu Ming, 26 taun, udah dibai Unit Penerebai Polis DiRaja Malaysia (PDRM) ari Padang Bilun Entarabansa Kuala Lumpur ke Padang Bilun Entarabansa Miri.
Lebuh datai ba padang bilun Miri urung pukul 1.55 ngalih hari tadi, saspek dibai ngagai lokap Balai Polis Opis Pansik Penyalah (JSJ) Miri ungkup pansik silik.
Ba lansa sama, Koong (saspek) diberita baru datai ari menua China pengudah diburu pulai unit penerit adat menua nya ke Malaysia laban pasport udah abis timpuh.
Kes dipansik nengah Seksyen 302 Kanun Keseksaan ti mai ukum mati mandatori.
Kena 21 June 2016, Bill Kayong ditimbak lebuh kerita niang ngetu ba simpang lampu trafik di Kuala Baram.
Pengudah penusah nya, Koong belalai lalu dipadahka lari ke China pengelama lima taun pengudah polis ngelala iya, siku ari saspek kes munuh Bill.
