Kes bunuh ukai enggau niat, dijil 15 taun

KUCHING: Siku pengereja pengawa kontrak ti ngaku bekaul kes munuh bakih sama gawa udah diletak ukum 15 taun jil, kemari.

Akim Kort Tinggi Ravintran N Paramaguru udah ngerah Amie Anak Temenggong, 28, napi ukum jil nya berengkah ari haribulan iya ditangkap kena 8 Disember 2017.

Maya mantaika pemutus bekaul enggau kes ke ditapi Amie, Ravinthran beratika bakal ke ditapi orang ke udah mati chukup balat taja lelaki ke salah nya nadai nguna senjata, pia mega sekeda tulang kerigai lelaki ke besalah nya bisi patah lalu raban doktor buntas ti mansik tetemuka orang ke mati ketegal trauma kena bukut ba perut.

Amie ngaku penyalah diri pengudah piak pendawa mindahka kes ari Seksyen 302 Kanun Keseksaan ngagai Seksyen 304(a) kanun ke sebaka lalu ulih kena jil enda ngelui 30 taun.

Lelaki tu didawa ukai enggau niat munuh bakih ke sama enggau gawa ke mega pengereja pengawa peranak Indonesia Augustinus urung pukul 10.45 malam ngagai 11.57 malam ba rumah lus pengereja pengawa di taba pengawa berumah Kuching City Mall Expressway Batu Kawa ditu kena 18 Disember 2017.

DIJIL…Lelaki ke besalah (kiba) berandau enggau luyar iya (kanan) di luar pintu kort.

Nitihka apil digaga luyar iya, Fung Lee Fook lelaki ke besalah tu datai ari ruang bilik ke udah pambar iya nya maya umur lima taun iya enggau indai sereta empat iku sida menyadi ditinggalka apai sida.

Lelaki tu semina sekula naka primari tiga laban sida sebilik bisi penanggul belanja sereta maya umur 12 taun iya udah gawa berat di Sibu, udah nya indai enggau sida menyadi pindah ke Johor lalu ninggalka iya kediri ba Sibu.
Udah nya, lelaki tu pindah kitu gawa kontraktor ba palan kes tu nyadi.

Maya hari penusah nyadi, urung pukul 6.30 lemai, lelaki tu duduk ngirup ai bisa enggau bakih (iya ti nadai) begulai enggau siku agi bakih ke sama bilik ngujungka laya nyadi entara lelaki tu enggau bakih iya.

Udah nya, lelaki tu pulai ke bilik. Bakih ke enggau belaya enda puas ati laban ke udah mabuk tama ke bilik lalu bamuk ngena jari pengelama beberapa minit.

Udah nya, bakih ke mabuk dipeda bala bakih bukai nadai enseput agi ngujungka lelaki tu ditangkap polis bekaul ari penusah nya.

Luyar iya madah lelaki tu udah nesal ari ulah diri lalu tu penyalah keterubah iya lalu nyema iya dijil minta kort nganjung iya dijil ba Rumah Jil Sibu awak sida sebilik ulih ngabas.