Kes Covid-19 ba Sarawak manggai 1,000

KUCHING: Komiti Penyangga Penusah Ngenyit Nengeri (JPBN) Sarawak madahka Kluster Greenhill nambah lima kes seraya Kluster Wisma Saberkas nambah tiga kes.

Chairman iya, Datuk Amar Douglas Uggah Embas madahka bisi 1,433 iku udah diperesa ngaul Kluster Greenhill ke alai 87 kes ditemu positif Covid-19, 1,285 iku negatif enggau 61 iku agi nganti pemutus.

Pia mega ku Uggah, bisi 1,139 iku udah diperesa ngaul Kluster Wisma Saberkas ke alai 39 kes ditemu positif, 1,028 iku negatif enggau 72 iku agi nganti pemutus.

Iya madahka tiga kluster bukai iya nya Kluster Bah Arnab, Kluster Baki enggau Kluster Seladah nadai ngerikod kes baru.

“Sarawak ngerikod 14 kes baru positif Covid-19 lalu semua kes nya ba Kuching ngujungka kes nambah ngagai 1,011.

Suara Sarawak