ARTIKEL

Kes Covid-19 tubah mayuh, dini pengilap kitai?

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Kes Covid-19 agi ngelui 6,000 kes ninting hari nunjukka perintah puntan mutarka pandemik,
Pemikir politik Unimas Dick Lembang Dugun madah, atur darurat dipejalai kena nyeliahka pengawa bepilih dipejalai baka Pengawa Belilih Mit (PRK) enggau Pengawa Bepilih Nengeri (PRN).

Ku iya, nya pemutus ti engkeman laban kitai deka nagang mensia mayuh ari begelumu ti tau ngasuh covid-19 berampit lalu kes positif niki ngenyit.

“Taja pia, kes majak niki taja pengawa bepilih enda dipejalai lalu atur darurat tau dikumbai puntan nagang pengerekai pandemik.

“Dini pengilap kitai? Nya alai, ari utai ke nyadi kitai tau ngumbai perintah puntan mutarka penusah ti ngeruga ekonomi enggau pengelantang komuniti,” ku iya lebuh dirandau Suara Sarawak.

Enti perintah udah puntan ku iya, tentu deka meri empas dalam timpuh panjai lalu tau ngasuh menua labuh.
Perintah puntan tauka menua puntan? Isu tu tebantai pengudah siti kolumnis portal Bloomberg mantaika ripot pasal penemu ti madahka Malaysia majak labuh, dikelai ari tambai burak digitang.

Terang Dick, tibak penemu Danial Moss senutuk endar ke alai Malaysia nyau salah singkang, nuju sebuah menua ti puntan, ari sukut menua ti tegap enggau lemi tauka puntan.

“Kenu ku Zartman (1995) ditibak ari Valentine Cojanu (2007) dalam artikel benama Analysis of Failed States: Some Problems of Definition and Measurement, menua dikumbai puntan enti enda tejagaka pengelikun, ekonomi, sistem politik enggau sistem pengelantang rama rayat.

“Tu mih penemu suah diterima mensia mayuh pasal jaku dikena mandingka menua puntan,” ku iya madah nyemetak.

Dick madah, lapan tauka semilan ari 13 penempa menua puntan ulih dipeda ba utai ke nyadi di Malaysia baka penemu dibantaika Malek (2006) dalam Valentine Cojanu (2007).

Siti ari pekara nya, nyau enda mayuh rayat angkunka menua tauka perintah, ke alai perintah Perikatan Nasional (PN) apin diuji nengah undi pechaya tauka unda enda pechaya ba Parlimen.

Undi nya deka nentuka perintah ke diatu patut bisi tauka enda, kelebih agi maya rayat nyau terumpang pengarap tauka enda andalka perintah mutarka pandemik Covid-19.

Sekeda ejensi dipeda enda tekerejaka pengawa baka nyaga pengelikun, ekonomi enggau pengerai.

Kelimpah ari nya, mayuh pelin dipejalai ari sukut ekonomi tang meh empai nyengala mujur dipeda. Pemuntan perintah ngaduka pekara ekonomi meri empas besai ngagai pengidup rayat besehari sehari.

Nya alai mayuh pekara ngeregau runding Dick, sekalika chara dikena perintah mutarka pandemik tu enda semitan tauka bisi pengilap?

“Kes positif tinggi enggau nyawa bebadi majak nambah ninting hari dataika penyampau kumulatif 6,000, apin dikira kes munuh diri ketegal penyuntuk.

“Pejalai Atur Mindah Betagang (PKP) ti nating pengidup rayat nyata enda tetagangka igi penyakit ari majak ngerekai lalu pekara tu ti patut diberi perati,” ku iya madah nyemetak.

Nya alai ku Dick, isu tambai burak, tambai chelum, tanda pagar #perintahpuntan ngayanka nama kebuah menua luar meda kitai mansang ngagai pemuntan.

“Baka jaku disebut Danial Moss, kitai deka labuh enti diperati ari sukut penegap enggau pengelemi tauka pemuntan sebuah menua.

“Nya kebuah, kitai patut naka ulih ngaduka menua sebedau sagam penemu menua bukai nyadi nyata,” tandu iya.

BERITA LAIN

BERITA TERBARU