Kes denggi di Sarawak nambah

KUCHING: Kes sakit denggi di Sarawak ngerikodka penambah sepenyampau 1,487 ba bulan Januari ngagai Ogos taun tu.

Direktor Opis Pengerai Nengeri Sarawak Dr Jamilah Hashim madah tu nambah 1,004 kes enti dibanding enggau taun 2018 alai semina 383 kes ba timpuh ke sama.

“Kes denggi tu bepusin, bisi taun iya niki, bisi taun iya baruh lalu pemadu mayuh nambah taun tu nyadi ba bagi menua Kuching.

“Ba bagi menua tu taun 2018, semina 43 kes, tang taun tu bisi 558 kes dirikodka nyadi nyengkaum ba Miri, Sibu enggau Betong ti mega ngerikodka lebih 100 kes,” ku iya.

Jamilah madah munyi nya lebuh dirandau pemberita pengudah pengawa bejadika Stop Stigma Rum 2019 ba luar Begunan Dun Lama ditu, kemari.

Nangkan nya ku iya, pengawa beripai besai deka dipejalai ba selampur Malaysia sereta dipenyadika Menteri Pengerai Datuk Seri Dr Dzulkefly Ahmad kenaka 15 September tu.

Ku iya madah, ba renggat nengeri piak sida deka ngatur pengawa beripai nya di Kampung Simuti, Padawan kenaka 21 September tu.

“Nengah program ti baka tu, kitai ngarapka nya deka nulih nambahka penyedar ngagai mensia mayuh ngambika lebih nemu agi nyaga pemeresi rampa menua ba pelilih diri empu.

“Tu nyengkaum muai semua palan ti bisi penau alai nyamuk betelu lalu kami mega ngarapka tu ulih nagang sakit denggi nyerekai enggau lebih besai agi,” ku iya.

Dr Jamilah Hashim

Suara Sarawak