Kes ‘Phone Scam’ majak nambah di Sarawak

KUCHING: Ulah nipu ngena chara nyaru diri nengah panggil telefon, ‘Phone Scam’ enggau pinjau bula majak nambah di Sarawak.

Nya alai, Ketuai Opis Pansik Penyalah Komersil Sarawak, Superintendan Maria Rasid ngelalau mensia mayuh seruran bejimat enggau chara dikena sindiket nipu tu.

“Mensia mayuh agi kena tipu sindiket tu sukut duit ringgit taja lalau enggau gerah ari polis udah dibantai nengah media rama enggau surat kabar,” terang iya.

Ku iya, bisi 24 kes diripotka dalam timpuh 1 ngagai 31 Januari tu tadi bekaul kes nipu nyaru diri nengah telefon enggau pengerugi lebih RM252,000.

Ku iya, sindiket tu udah nipu orang beumur entara 19 ngagai 72 taun ke alai lapan iku ari sida nya pengereja ba sektor peribit, siku orang gawa perintah seraya 15 iku nya gawa kediri, bini orang diau ba rumah nyengkaum orang nadai kereja.

Ngelansa silik, Maria madahka modus operandi iya nya saspek deka telefon ngagai sida ti ditagit nya sekalika nengah panggil telefon tauka nganjung pesan ngagai Whatsapp, Wechat enggau Facebook Messenger ti nyaru diri nyadi bakih tauka kaban belayan.

“Saspek deka madahka diri idup merinsa baka kena rumpak, kerepai enggau telefon binching lenyau enggau ke bukai lalu madahka diri deka nginjau duit.

“Sida ke kena tipu tadi nadai penangi masukka duit ngagai akaun orang ke enda dikelala baka ti diberi saspek lalu sida semina sedarka diri udah ditipu pengudah telefon ngagai bakih tauka kaban belayan endur sida ngirum duit nya,” ku Maria nerang.

Bekaul kes ‘Phone Scam’, Maria madahka 10 kes diripotka ba timpuh 1 ngagai 31 Januari taun nyin kemari enggau pengerugi lebih RM132,000.

Ku iya, sida ti kena tipu tu beumur entara 25 ngagai 45 taun ke alai empat iku nya orang gawa perintah, empat iku pengereja ba sektor peribit enggau dua iku pedagang.

Terang iya, modus operandi sindiker Phone Scam tu iya nya telefon ngagai sida ti ditagit nyaru diri nyadi pegawai polis, pegawai Opis Pengumpul Pupu Dalam Menua(LHDN), Bank Negara Malaysia, bank komersial enggau ke bukai.

“Udah nya, sindiket deka ngenakutka orang ti ditagit nya baka nama sida dikena rejister sebuah serikat ke nadai mayar chukai, sida bisi rikod nadai mayar kad kredit tauka pinjau bank, bisi kait engau salah guna dadah, ngaga wang pelesu enggau ke bukai.

“Dikena nutup kes tu, sida deka diasuh masukka duit ngagai siti akaun tauka masukka duit ngagai akaun orang ketiga ngambi ngemuntangka pengawa mansik kelimpah nentuka akaun nya enda disekat Bank Negara Malaysia sereta sida nadai diasuh mayar chukai tinggi rega,” terang iya.

Nangkan nya bekaul enggau kes pinjau bula, Maria madahka bisi 38 kes diripotka ba timpuh 1 ngagai 31 Januari tu tadi enggau pengerugi lebih ari RM536,000.

Ku iya, empat iku ari sida ke kena tipu nya orang gawa perintah, 19 iku pengereja ba sektor peribit enggau 15 iku nya orang gawa kediri, sida ke udah pinchin, bini orang diau di rumah, nembiak nyengkaum orang nadai kereja beumur entara 18 ngagai 69 taun.

Maria madahka modus operandi sindiket tu iya nya nyendiaka pinjau duit nengah online baka website, media rama, aplikasyen telefon binching tauka SMS.

Nya alai, Maria ngelalau mensia mayuh ngena portal enggau aplikasyen ‘Semak Mule’ ngambi meresa akaun bank enggau lumur telefon dikena sindiket nipu nya.

Pia mega ku iya, mensia mayuh ulih meri penerang nengah Whatsapp tauka SMS nuju Infoline Opis Pansik Penyalah Komersial (CCID) ba lumur 013-211 1222.

“Sebarang penerang silik tauka gerah baru pasal sindiket nipu duit nya, mensia mayuh tau ngelawa portal rasmi Polis DiRaja Malaysia (rmp.gov.my), Opis Pansik Penyalah Komersil (ccid.rmp.gov.my) enggau Facebook Opis Pansik Penyalah Komersil Sarawak,” terang iya.