KUCHING: Kes positif di Sarawak terus nambah ngagai 12,273 kes pengudah 222 kes positif baru Covid-19 dirikodka kemari.
Komiti Penyangga Penusah Ngenyit Nengeri (JPBN) nengah sebengkah penerang media kemari madahka kes baru positif Covid-19 tu ditemu nyadi ba Pelilih Menua Miri ti ngerikodka 57 kes, Sibu (38), Kuching (29), Bintulu (25), Betong (12), Meradong (12), Julau (10), Subis (9), Kapit (7), Song (7), Samarahan (4), Saratok (2), Serian (2), Limbang (2), Bau (1), Kanowit (1), Mukah (1), Sarikei (1), Sebauh (1) enggau Telang Usan (1).
Ba penerang nya mega JPBN madahka, ari 222 kes positif baru tu 35 iku bisi nunjukka kelai kena rampit lebuh beperesa Covid-19.
Udah nya, bisi 168 kes positif ti ditemu tu ba orang ti diasuh kuarantin ba palan kuarantin ti udah disediaka ke alai 167 iku ngaul orang diau ba sitak mudah kena rampit tauka kategori Import B.
Nangkan ke nya, Sarawak mega ngerikodka 236 kes baru udah suman sereta dikemendarka pansut ari sepital iya nya ari Sepital Sibu bisi 107 kes, Sepital Miri (44), Sepital Besai Sarawak (35), Sepital Bintulu (30), PKRC Sepital Kapit (8), Sepital Sarikei (5), Sepital Sri Aman (4) enggau PKRC Betong (3).
Nya ngujungka kes udah suman sereta dikemendarka pansut ari sepital diatu nambah ngagai 9,826 iku.
Berebak enggau nya, JPBN dalam penerang ke sebaka madahka Pelilih Menua Limbang bebali ngagai status kuning pudah ngerikodka dua kes baru positif Covid-19.
Pelilih Menua Dalat mega bebali ngagai status kuning pengudah ngerikodka 17 kes berampit dalam timpuh 14 hari.
Taja pia, Pelilih Menua Selanggau bebali pulai ngagai status kuning ari mirah pengudah seminga ngerikodka 19 kes dalam timpuh 14 hari.
Udah nya, Pelilih Menua Bau bebali ngagai status oren ari status mirah.
