Kes positif di Sarawak majak niki, manggai 55 kes baru

KUCHING: Sarawak sehari tu ngerikodka kes baru positif Covid-19 pemadu tinggi iya nya manggai 55 kes.
Komiti Penyangga Penusah Ngenyit Nengeri (JPBN) madahka 55 kes tu nyengkaum ba Sibu (37 kes), Kuching (15 kes), Miri (2 kes) enggau Bintulu (1 kes).
Nya gujungka penyampau kes positif Covid-19 di menua tu nambah 1,251 kes.
Pelilih Menua Sibu ngerikodka kes positif baru pemadu mayuh kemari empas ari kes berampit ngagai 37 iku peranak di sebuah rumah panjai di Pasai.
Kes tu bepun ditemu pengudah siti kes positif ti diasuh kuarantin ba rumah kena 7 Januari tu tadi.
Semua sida ti positif tu beumur entara 11 bulan ngagai 79 taun ke alai lima ari sida nya nembiak baruh umur 12 taun.
Semua sida ke diperesa kena 7 Januari ditemu positif Covid-19 kena 8 Januari.
Pansik tumu madahka semua kes nadai nunjukka sebarang tanda dirampit tang sekeda sida udah madahka diri bisi tabin enggau batuk.
Nya alai, semua kes tu udah dipasukka ba Sepital Sibu ungkup pansik bukai.
Berindik ari nya, siti kluster baru ti dikumbai Kluster Pasai, Sibu dirikodka kemari ti ngaul Pelilih Menua Sibu enggau Mukah.
Kes indeks tu datai ari kes ke 1,175 ti ditemu positif kena 7 Januari ti baru pulai ari Semenanjung Malaysia.
Naka sehari tu, bisi lima kluster ngerekai dirikodka ba Sarawak iya nya Kluster Pasai Sibu, Kluster Keranji Tabuan, Kluster Bah Sayap, Kluster Stutong enggau Kluster Mador.
Pia mega, kemari Pelilih Menua Sibu bebali ari status kuning ngagai status oren pengudah ngerikodka 39 kes berampit dalam menua dalam kandang 14 hari.
Pelilih Menua Kuching agi mengkang ba status oren lalu Pelilih Menua Lawas bebali ari status kuning ngagai status gadung kemari pengudah nadai kes berampit dalam menua dirikodka dalam timpuh 14 hari.