Kes positif mayuh nambah bepun ari dua kluster

KUCHING: Kes baru positif Covid-19 nambah datai ari Kluster Tembok di Sri Aman enggau Kluster Jalan Puncak Borneo di Kuching.

Komiti Penyangga Penusah Nengeri (JPBN) Sarawak madahka Kluster Jalan Puncak Borneo ngerikod 47 kes baru positif Covid-19 seraya Kluster Tembok ngerikod 76 kes.

JPBN madah, 51 kes baru positif ke bukai diripotka tadi nya ari kluster bukai ti agi ngerekai.

Sarawak sehari tu ngerikod 489 kes baru positif Covid-19 ngujungka kes nambah ngagai 21,448.

Kuching ngerikod 99 kes ditangkan 76 kes di Sri Aman, 75 kes di Sibu, 50 kes di Miri, 48 kes di Bintulu, 32 kes di Beluru, 25 kes di Samarahan enggau 17 kes di Sarikei.

Nambahka nya, bela semilan kes di Kapit enggau Mukah, bela lapan kes di Belaga enggau Meradong, tujuh kes di Serian, enam kes di Saratok, bela lima kes di Subis enggau Marudi, tiga kes di Bau, bela dua kes di Julau, Matu sereta bela siti kes di Lubok Antu, Pakan enggau Kabong.

Lima kes pemati dirikod ngujungka kes pemati nambah ngagai 133 kes.

Ari 489 kes nya, 23 kes udah ditemu bisi mantaika kelai kena rampit igi penyakit Covid-19.

Suara Sarawak