KUCHING: Tangguh dulu ubah Akta 1(2) Konstitusyen Perintah Besai 2019 enggau tejuka bala komiti dipilih khas ngaluska pekara nya, ku penemu Ketuai Nembiak PRS Datuk Snowdan Lawan.

Snowdan mansutka jaku tu lebuh dipinta ngelansa pasal bacha kedua rang undang-undang nya ti dibantai Menteri Besai Tun Mahathir Mohamad di Parlimen, ensanus.

“Enti kitai semina macha ari luar bup nya, ngasuh kitai lalek lalu enda ingatka isi penerang dalam bup nya.

“Batang pekara tu iya nya baka ni isi kontrak rama ulih dipegulai, dipulai, enggau pekara ti lenyau sebedau tu ulih diberi pulai sereta diatur meruan, ba pekara politik, rama enggau ekonomi Sabah enggau Sarawak,” ku Snowdan.

Ku Menteri Muda Nembiak enggau Lumba nya nambah, Sarawak enggau Sabah deka meda pengamat semaya lalu ulih nyadi nyata sereta ukai semina ubah atas keretas aja.

DATUK SNOWDAN LAWAN

“Nentuka ubah tu endang amat ngasi, genteran jaku ti ngayanka semengat MA63 enda tau enda ditulis laban tu pun konstitusyen nya,” ku iya.

Kenu ku Snowdan, Dun Sarawak enggau Sabah dalam Komiti Perunding MA63 bela patut berundingka pekara ti ngaul nengeri sida.

“Pugu pekara kontrak rama patut manah agi disebut nyemetak tauka dipujur nyadi nyata. Ambika chunto, isu di Shelter Continental ti lebih ari ke patut ari Ordinan Darurat dalam taun 1969 udah ngeluarka pemansut minyak enggau gis Sabah Sarawak ngagai Perintah Besai.

“Kelaung tauka pengawa ngelanggar tu mega patut dituku,” ku Snowdan ti mega datai ba Parlimen deka meda aum nya, setuju enggau penemu Datuk Seri Wan Junaidi, ke alai ubah nya patut dulu agi bisi penerang silik sebedau dilangkar.

Ensanus, Tun Mahathir lebuh mantaika bacha kedua kali RUU nya madah perintah merambu ubah ngagai Fasal (2) Perkara 1 Konstitusyen Perintah Besai dikena ngagihka baru agih pasal nengeri-nengeri perintah besai baka penuduk diagih lebuh Gempung Malaysia ditumbuh, enggau ubah engkeman ti patut.

Langgur ubah nya ku iya, nyadi pemutus ti patut ba pengawa perintah nangkup peminta Perintah Sabah enggau Sarawak baka ti dibantai enggau dipejurai dalam Komiti Khas Kabinet ngambi meresa pejalai MA63.

Suara Sarawak