KUCHING: Ketuai pampang enggau tuai renggat baruh ba selampur Sarawak diperansang gawa dalam siti tim dikena negapka iring tuai ba menua pesisir.
Menteri Muda Pemansang Infrastruktur enggau Penyangkai Kapal Datuk Julaihi Narawi madah, nya beguna amat dikena nentuka iring raban tuai ba menua pesisir terus kering enggau sepenemu dalam bejalaika servis ungkup rayat.
“Nya mega beguna dikena nentuka pemujur polisi, juluk enggau agenda perintah enggau pemansang Sarawak lebih agi ba menua pesisir.
“Nyema iring ketuai ba menua pesisir lemi, sebana kitai sigi enda didinga lalu nya tentu ngerugi sitak menua pesisir nya empu,” ku iya.
Julaihi ke mega Adun Sebuyau madah munyi nya maya bejadika kus tuai Gempung Parti Sarawak (GPS) enggau Parti Pesaka Bumiputera Bersatu (PBB) Pampang Saribas betuaika Mohd Razi Sitam, kemari.
Iya mega madah, sitak Saribas ari sukupolitik endang beguna sebaka engagu sitak bukai ba Sarawak.
“Sitak Saribas mega mantu enggau bejalaika tanggungpengawa. Nya alai, nyema udah datai Pengawa Bepilih Nengeri (PRN), sitak tu mesti ditan enggau menang nengah GPS,” ku iya.
Ku iya, GPS nyadi gempung parti politik ti diarika semua pupu bansa ba Sarawak ngembuan peneleba enggau pengering merintah Sarawak.
“Nya alai, bala tuai ba renggat baruh enggau ba semua renggat sitak Saribas lebih agi ba selampur Sarawak, mesti bekerejasama dalam siti tim nyaup pemujur GPS,” ku iya.
