KGBS nyukung pemutus JPBN nangguh pengawa muka sekula ba zon mirah

 

INDUN SILONG
suarasarawak.sv@gmail.com

KUCHING: Gerempung Pengajar Bumiputera Sarawak (KGBS) nyukung pemutus JPBN nangguhka pengawa muka sekula ngagai pelilih zon mirah di menua tu.

Presiden KGBS Ahmad Malie dalam siti penerang media kemari madahka pemutus nya engkeman ngagai isu pelajar laban pengerakai penyakit Covid-19 agi balat.

“Ungkup pengerai enggau pengelikun raban sekula kelebih agi bala pengajar, nembiak sekula enggau pengereja pengawa bukai, KGBS nyukung pemutus tu.

“Kelimpah ari nya, pemutus tu mega ulih nagang pengerekai penyakit Covid-19,” ku iya.

Ahmad mega ngarapka raban apai indai mereti sereta nerima pemutus nangguhka sekula tu enggau sabar.

“Taja pia, KGBS ngarapka raban pengajar ba sekula nya terus besedia ngatur pengawa Ngajar enggau Belajar ari Rumah (PdPR) laban nya nyadi chara beguna ungkup nembiak napi isu nangguhka sekula ba pelilih menua ti udah dipadahka.

“Sukung enggau kerejasama apai indai enggau penyaga mega dipinta ngambika anak sida enda tinggal ari pelajar.

“KGBS ngarapka PdPR tu ulih dipejalai enggau meruan awakka pengawa belajar nembiak enda balat kena pangka ketegal pemutus nangguhka sekula nya,” ku iya.

Suara Sarawak