KUCHING: Pemutus ke digaga Opis Menteri Pelajar Malaysia (KPM) nginsil peresa Ujian Penilaian Sekolah Rendah (UPSR) enggau Pentaksiran Tingkatan Tiga (PT3) ungkup taun 2020 siti pekara ti patut, ku Presiden Serakup Pengajar Bumiputera Sarawak (KGBS) Ahmad Mahlie.
Ku iya, pengawa nginsil peresa nya nadai meri bekau ba kualiti pelajar nembiak ke bekaul tang deka ngasuh sida bebendar agi deka belajar sereta nadai mayuh pejal ari mayuh macham piak.
“Kami meda pengawa nginsil dua bengkah peresa tu ulih numbuhka siti pekara ti baru ba pengawa belajar ke alai bala pengajar enda ibuh berumban ngabiska silibus sida sebedau peresa dipejalai.
“KGBS mega meda pengawa nginsil UPSR enggau PT3 tu tau ngasuh bala nembiak ngasaika pelajar ti rindu seriris enggau konsep ngajar ngerindang ke difokuska ba ‘Pembelajaran enggau Pemudahcaraan’ (PDPC) ke diatu,” ku iya madah ba siti penerang berita, kemari.
Nangkan nya ku Ahmad, piak sida mega besetuju enggau pengawa ngelanjarka peresa SPM, SMV, STPM enggau STAM ke dibantaika piak KPM apin lama ke udah.
“KGBS pechaya KPM udah ngaga siti pemutus ke manah enggau berundingka penemu ari mayuh piak asil sesi ‘sindikasi libaturus’ begulai enggau piak pemegai tarih ke bisi hak ba pelajar menua,” ku iya.
Tu mantaika KPM mega ngemeratka guna bala nembiak sebedau sida nurun beperesa, lalu KGBS madahka tu siti peluang ngagai bala nembiak nyikap diri enggau penuh, ku iya.
“Tu ukai semina nyikap ari sukut isi akademik tang mega nyikap ari sukut runding enggau ulah pengudah sida bekurung sekumbang Atur Tagang Pejalai (PKP),” ku iya nambah.
Ku Ahmad, piak sida beratika strategi pasca PKP tu nadai meri pengerugi ngagai bala nembiak la an KPM udah ngaga pekara ti alternatif enggau proaktif dalam ngatur pekara ke bisi.
“Ambika chunto, KPM udah berandau enggau KPT bekaul enggau haribulan bala nembiak tama ngagai institusyen pelajar tinggi (IPT) tauka kolej taun tu enggau taun baru.
“Nya alai kami minta mensia mayuh kelebih agi alai indai nerima pekara bekaul enggau pelajar menua kitai rambau pasca Covid-19 enggau tebuka,” ku iya.
Ahmad mega minta ngambika semua nerima bekau dibai ari Covid-19 ukai semina ngagai pengerai tauka chara pengidup tang meri empas ti chukup besai ngagai pengawa pelajar ba menua tu.
Apin lama ke udah, KPM mantaika UPSR enggau PT3 ba taun 2020 dikinsil lalu tu diteritka ngagai semua sekula perinta, sekula bantu perintah, sekula swasta enggau instistusyen pelajar ke direjister di baruh KPM.
Sekula ke enda direjister enggau KPM mega dilalau ngambika nitih atur ke udah ditetapka nya.
