KUCHING: Penegar atlit baru Para Nyemerai Sarawak, Kho Zhen Wee mujur ngalahka tiga atlit nasional ba lumba 50 meter (kategori S14).
Entara atlit nasional ke ulih digelih Kho ba lumba nya kemari Mohd Adib Iqbal Abdullah ari Sarawak, Anas Zul Amirul Sidi enggau Yong Chung Wei bela ari Pulau Pinang.
“Tu mandangka kitai Sarawak enda pungkang atlit ke bepenau sereta tegar.
“Arapka atlit baru baka tu terus dijaga enggau manah, tegapka disiplin sida dikena kitai nangkup Para Sukma ke deka diatur di Johor 2020,” ku Menijar tim Sarawak, Dayang Azlina Awang Alli.
Ba hari kepenudi Lumba Nyemerai Para Tebuka Malaysia 2019 ke diatur di Pahang kemari, tim Sarawak mujur nambah dua midul perak enggau siti engkeraju.
Ba pemutus penuh, tim Sarawak mujur mai pulai 21 midul nyengkaum enam midul emas, lapan midul perak enggau tujuh engkeraju ba lumba tu.
