BINTULU: Sarawak deka bejalaika pansik baru pasal perambu ngaga kilang kedua metanol dikena ngasilka ammonia, ku Premier Sarawak, Datuk Patinggi Tan Sri Abang Johari Tun Openg.
Abang Johari bejaku pasal perambu kilang metanol kedua ti asal dilanggur digaga pengudah kilang metanol keterubah di Tanjung Kidurong tembu ba taun 2024.
“Pengudah meda landskap dunya pasal pengawa dagang metanol sereta peminta kuasa bukai ti ulih ngena iya nyadi barang mata dikena ngasilka kuasa, aku udah minta Petchem Sarawak Sdn Bhd mansik baru perambu ngaga kilang kedua metanol.
“Kitai udah bisi siti kilang metanol tang kitai deka ngasilka ammonium, nyadi kilang kedua deka bepelasar ke ammonia,” ku iya ba Program Penyikap Gas Keterubah Fasiliti Nyual Gas Tambah Bintulu (BAGSF-2) di Tanjung Kidurong, kemari.
Iya madah, kebuah pia laban ammonia bisi pengulih tinggi ba makit bepelasar ke gaya ti diperati iya di Eropah enggau menua Timur Jauh nyengkaum ASEAN.
“Kadang sida deka ngasilka kuasa ngena ammonia ti nyadi barang mata, nyadi ketegal nya, aku udah minta Petchem numbuhka kilang ammonia di Bintulu.
“Tu siti pekara ti baru iya nya ammonia biru lalu ba penemu aku, enti kita ngira puku ti ulih diambi pulai baru, nya ulih dijamin bepanggai ba chara kita ngelakuka produk kita tang enggau ngelansa bepelasar ke peminta.
“Aku mega ngarap gas ti bisi ditu chukup dikena kitai ngasilka ammonia biru ungkup makit,” ku iya agi.
Nya alai, iya madahka diri udah minta Sarawak Petchem nempa kerejasama enggau kaban kunsi ti bekaul ngambi ngamat ke kilang ammonia biru di Bintulu.
Bisi bela datai, Sapit Premier Sarawak ti mega Menteri Dagang Antarabansa, Industri enggau Pemeranak Puku sereta Menteri Pemansang Mengeri enggau Pengeraja Asal, Datuk Amar Awang Tengah Ali Hasan, Menteri Industri Pemakai, Komoditi enggau Pemansang Wilayah Sarawak, Datuk Seri Dr Stephen Rundi Utom, Menteri ba Opis Premier Sarawak, Datuk John Sikie Tayai, Chairman Sarawak Petchem Sdn Bhd, Tan Sri Datuk Amar Dr Abdul Aziz Husain, Direktor Ukai Eksekutif PETRONAS, Datuk Ibrahim Baki sereta Mandal Presiden Kanan Pengatur Pekara Petroleum Malaysia, Mohamed Firouz Asnan.
