KUCHING: Peninju Sarawak nempa nama pengudah champion ba Pekit Tinju Profesional Pakistan di Bandar Gilgit, Pakistan, ujung minggu tu tadi.

Daeloniel Mc Delon bejuluk Kilat Boy ngemegahka nama Malaysia lebuh ngalahka manuk sabung ari menua Pakistan empu, Sikendar Abbasi ti udah ditemu jaguh ba kelang tinju.

Bujang sikar penakan Iban China ti ada ba menua benak pangka pasang nya menang ba Kategori 57 Kilogram (kg) enggau tumbuk dikumbai Technical Knock Out (TKO).

Mc Delon madah, iya endang nyendiaka diri chukup sebedau bepekit laban dibai ati keran deka ngangkat enggau mulaika baru jeman main tinju tebilang baka jeman Lejen Tinju Sapok Biki suba.

“Aku udah nyikap diri enggau chukup lebuh nemu diri dipilih enggau orang bepekit ba pekit tikas entabansa keterubah digulu aku.

“Tambah mega, aku nemu diri deka ngelaban Sikendar Abbasi ti udah nempa nama ba main nya ngelama tu.

“Nya ti ngasuh ati aku gagit sereta ransing agi betinju, ngelaban siku ari jaguh dunya ba main tinju,” ku iya lebuh dirandau Suara Sarawak.

Ke penerang, pekit ti diatur ba Stadium Lalak Jan nya mega bisi digulu bala peninju ari menua Indonesia, Thailand, Filipina, Korea Selatan enggau Nigeria.

Sebedau tu, Mc Delon kala menang Midul Emas ba Pekit Tinju Zon Borneo 2015, Midul Emas ba Pekit Tinju Profesional Jakarta 2016 enggau Midul Emas ba Pekit Tinju Profesional Mayor Cup Johor 2018.

Iya mega menang Midul Emas ba Pekit Tinju Nasional Trofi Malaysia Edisyen 2019-2021 enggau Midul Emas ba Pekit Tinju Trofi Menteri Nembiak enggau Lumba taun tu.

Anak ketiga ari empat iku diri menyadi nya madah, iya berengkah ngepunka singkang ba main tinju dalam taun 2014.

“Lebuh nya, umur aku kira baru 15 taun, enti baka manuk kira baru lanjau, munyi ku jaku sema orang tuai. Udah nya aku mupuk matih diri, ngansah pengelandik betinju.

“Idola tauka orang ti nyadi inspirasyen aku ba main tinju tu endang nadai orang bukai, jurulatih aku empu, Mejar Sapok Biki, ti mega jaguh tinju Malaysia.

“Baka atlit bukai, aku mega belatih nitihka program ti diberi jurulatih aku ari menua Philipines enggau jurulatih ari Sarawak ditu empu.

“Taga latih ditetapka bala jurulatih maya pagi enggau lemai, belebuh mega latih tambah diatur maya malam hari,” terang iya ke diatu nyadi kaban Tim Sarawak.

Mc Delon madah, orang ti meransang iya main tinju ari terubah suba endang ari pengeran ati iya empu kelimpah nerima sukung tegut ari indai enggau bala menyadi.

“Juluk ati aku semina siti, deka nyadi champion dunya ba main tinju dudi hari. Besai pengandal aku ngambi ulih nempa nama nyadi jaguh tinju ila.

“Ari nya tadi, aku deka nampung pengawa ke manah lalu ngansah agi teknik enggau chara betinju ti betul ari disiplin tinggi,” ku iya.

Taja ada di Sri Aman tang Mc Delon diau enggau ini aki iya di Betong lebuh agi mit suba, nya kebuah mayuh orang saru ari ni penatai asal iya ke bendar.

“Aku pulai ke Sri Aman baru lebuh sekula primari lalu pindah baru ke Betong lebuh masuk sekula sekondari.
“Sida aki ini ari sepiak indai aku endang asal orang Stambak Ili, Betong. Rumah panjai kami dia mih,” ku iya bekunsi mimit pasal menua asal diri.

Ku Mc Delon nampung randau ke ujung agi, peneleba berega lebuh terubah enggau orang bepekit ba menua luar iya nya ulih meda menua orang enggau ulih ngasaika asai belatih ba menua orang.

“Aku berasai gaga bendar laban ulih bekelala enggau bala jurulatih ari menua bukai baka Thailand, Indonesia, Philipines enggau Pakistan kelimpah nanggam kaul enggau bala peninju ari menua bukai.

“Mayuh penemu baru dikunsi bala kami lebuh berandau lalu sida mayuh meri jaku ajar ti beguna sereta ngajar teknik betinju ti betul. Kaul bebakih nyau asai lama udah teleba enggau pangan diri,” ku iya lalu tuchum.

Berindik ari nya, Mc Delon ngarapka mayuh agi raban nembiak sama chakah ngaul diri ba main enggau lumba kelebih agi main tinju tu ngambi kitai ulih nyeliahka diri ari ngereja ulah enda menuku.

Ku penemu iya, mayuh pemaik enggau penguntung ari kitai ngereja pengawa ti ukai semina ulih ngisi maya lepa tang mega ungkup pengerai enggau pengeregas tubuh sereta runding.

“Aku ngarapka perintah tauka bala ketuai ulih muka runding ngambi beratika lumba tu ulih mai menua kitai mansang ke mua.

“Minta mega bala tuai ti udah dilempai ngaduka pengawa ulih mantu bala kami kelebih agi baka aku ti suah begunaka belanja kena belatih ba menua luar tauka bebelika kereban kena bemain.

“Sukung enggau bantu kita beguna amat ngagai bala kami, ukai semina nyadika peransang tang kelai sukung kita ngagai pemansang lumba enggau main kitai di Malaysia kelebih agi Tanah Kenyalang ditu.

“Munyi ku aku dulu tadi, juluk ati ka nyadi champion dunya, laban aku keran nyulur legasi Sapok Biki,” ku Mc Delon nyimpul randau.