Kiong Chion sedia betemu enggau Violet ba Kort

KUCHING: Chairman Parti Sa’ati Rayat Sarawak (SUPP) Pampang Stakan Datuk Sim Kiang Chiok madahka iya besedia betemu enggau Adun Pending Violet Yong ba kort.

Dulu ari nya, Violet ngeluarka ‘Letter of Demand’ ngagai Kiang Chiok laban udah bekunsika siti gambar grafik Violet enggau jaku ‘Pengkhianat Sarawak?’.

Berindik ari nya, Violet minta iya minta ampun ngagai surat kabar English enggau China nyengkaum ba facebook.

Ku Kiang Chiok, gambar grafik ti dikunsika iya nya endang udah dikunsi bala penguna media rama ti bukai tang nama kebuah iya aja ti nerima ‘Letter of Demand’.

“Kena 29 April aku bekunsika siti gambar grafik Violet ti diulih aku ari aplikasyen Telegram ke dikunsi siku penguna benama Emma Leong.

“Ukai aku siku ti bekunsika gambar grafik nya ba media rama, tang nama kebuah aku siku aja?,” ku iya.

Kiang Chiok bejaku munyi nya ngagai pemberita ba aum media di Opis Besai SUPP ditu, kemari.

Ku iya, ‘Letter of Demand’ ti dikeluarka Violet udah datai ba iya lalu udah diperunding enggau penyanding penemu undang-undang (legal adviser) nyengkaum penyanding penemu undang-undang parti.

“Aku sanggup napi pekara tu, nya alai aku deka madah munyi tu, ‘betemu enggau nuan ba kort’ (see you in court).

“Aku nyemetak madahka aku enda deka belembut lebuh mantaika pekara ti bekaul enggau rayat kelebih agi rayat Sarawak,” ku iya.-INDUN SILONG

Suara Sarawak