KIR setinggan terus dibantu bulih rumah

KUCHING: Perintah Sarawak udah nyendiaka rumah ngagai 5,469 ari 9,760 ketuai bilik (KIR) setinggan ti udah ngerejister diri nengah bemacham inisiatif ti disedia.

Menteri Kaunsil Kandang Menua enggau Pengawa Berumah, Datuk Seri Sim Kui Hian madahka apin lama perintah mega ngemendarka palan pengentap ngagai 1,478 KIR setinggan seraya 2,813 KIR setinggan agi mansik palan pengentap ke bukai.

“Nambahka nya, Kaunsil Pemansang Pengawa Berumah Sarawak (HDC) madahka bisi 935 unit rumah Program Rumah Rayat (RPR) enggau Projek Rumah Rayat (PPR) agi puang enggau peminta agi dibuka.

Tu nyengkaum setinggan ba Bagi Menua Kuching, Serian, Sibu, Bintulu enggau Miri.

“Isu ngereja tanah perintah enggau tanah ti bisi pengempe mega udah dikerandau,” ku Kui Hian.

Kui Hian mansutka jaku nya lebuh betuaika Aum Komiti Pengatur enggau Mutarka Penanggul Setinggan Nengeri Sarawak (JPPSN) ba taun 2010, ditu kemari.

Kenyau ari JPPSN ditumbuh, perintah mujur nyendiaka 5,469 buah rumah enggau keran ngiga chara mutarka penanggul setinggan bukai.

“Nya kebuah, mensia mayuh dilalau seruran ngelawa staf Opis Tanah enggau Surbey ngambi ngenukuka status tanah dikena nyeliahka penusah ke tau nyadi.

“Penyalah ngereja tanah perintah ulih kena ukum nengah Seksyen 209 Kanun Tanah Negeri (BAB 81).

“Semua orang mesti meri kerejasama nagang isu setinggan enggau penyalah ngereja tanah perintah ti nyadi ba menua tu,”terang iya.

Ku Kui Hian, komiti mega setuju mansik baru strategi pemadu manah nagang isu setinggan di Sarawak.