SIKU ari kaban Masterpiece udah ngangkatka industri muzik Dayak ngagai tikas ke tinggi agi pengudah kisah pengidup iya diaku enggau deka dipasuk dalam Bup Ensiklopedia ‘Successful People In Malaysia’ (Orang Pegari Di Malaysia).
Aldrine Phillie tauka tampak agi dikangau Depha madahka nama iya deka dipasuk dalam Bup Ensklopedia Orang Pegari Di Malaysia dalam kategori muzik ungkup Industri Muzik Dayak.
Ba penerang dikunsi Depha ba ruai Facebook iya, bisi siku lelaki benama Syafiq ari British Publishing House Ltd madahka sida deka mansutka bup ensiklopedia tusun ketiga lalu deka masukka nama Depha dalam rintai pemuzik Malaysia.
Lebuh dirandau, Depha madahka diri enda ngadang nerima berita nama iya dipasuk dalam Bup Ensiklopedia.
“Kebendar, aku empu nadai ngadang nerima berita tu laban kitai bela nemu Ensiklopedia Malaysia tu ditatak ngagai sekeda pekara aja.
“Bup Ensiklopedia Malaysia ‘Successful People In Malaysia’ tu enda nyalah baka artikel Forbes ba Amerika din.
“Nyadi, berapa hari ke udah pengari ari Ensiklopedia bisi berandau enggau aku lalu sida mega nerangka mayuh pekara diperunding sebedau ngaga pemutus milih aku.
“Amat pen sida nelai nama aku kediri tang ari sukut muzik, semua nama bala menyadi dalam Masterpiece nya endang diraup aku magang.
“Kebuah pia laban kami dalam raban Masterpiece udah gawa nyadi siti tim lalu kami mega udah besaup nempa pemujur baka ke diatu.
“Ba aku, Masterpiece nya udah nyadi pengidup aku kenyau ari 16 taun ke udah, kami sebuat enda kala ninggalka pangan diri sekalika maya tusah enggau senang.
“Raban dalam Masterpiece nya mega udah baka menyadi aku ari terubah Masterpiece masuk dalam industri muzik tu nyentuk diatu.
“Tu nyengkaum pemujur enggau anugerah kala diterima Masterpiece dalam industri muzik Dayak di menua tu,” ku Depha asal ari Kapit.
Pia mega ku Depha, raban ari Ensiklopedia tu mega deka beratika dulu pemujur orang ti dipilih.
Ku iya, sida deka beratika mayuh pekara baka ari sukut gaya pengidup, pengaruh tauka ‘influence’ nadai ngira sekalika dalam media rama tauka pekara bukai.
Depha mega madahka raban ari Ensiklopedia Malaysia mega deka beratika pengawa ke manah dibantai ngagai bala ‘followers’ tauka peminat kelebih agi ngagai rebak biak ari sukut pemai diri, pekara positif ke tau dichunto, pemeresi nama ba media rama ari semua pekara negatif tauka publisiti.
Ungkup penemu, reti eksiklopedia tu siti bup penerang ke ngundan penerang penuh ditambah enggau sub topik pasal penemu tauka siti bidang.
SUKUNG ARI SEMUA
Sebedau tu, raban Masterpiece kala nerima 14 Anugerah iya nya ba taun 2010, sida mujur nerima lima anugerah rambau Anugerah Muzik Dayak (AMD) baka Anugerah Raban Penanyi Pemadu Tebilang, Anugerah Muzik Video Pemadu Manah, Anugerah Karung Album Pemadu Manah enggau Anugerah Album Sepanjai Taun.
Ba taun 2014, sida mujur bulih dua anugerah rambau Anugerah Tusun Sapa Juara (ACSJ) iya nya Lagu Pemadu Manah enggau Pemerindang Pemadu Manah.
Raban Masterpiece mega mujur bulih tiga anugerah rambau AMD 2016 iya nya Anugerah Album Sepanjai Taun, Anugerah Vokal Pemadu Manah (Band) enggau Anugerah Pemerindang Pemadu Manah.
Rambau ACSJ 2017, raban Masterpiece mujur bulih dua anugerah iya nya Anugerah Lagu Pemadu Manah (Runner up) enggau Anugerah Pemerindang Pemadu Manah.
Depha mega kala nyadi penengkebang lagu ungkup penanyi bukai baka Hailey Robson, Melissa Francis, Watt Rock enggau Lyssa Jean kelimpah iya mega siku penanyi enggau vokalis rock ti tebilang ba Sarawak.
Ngelansa pasal pemujur nama iya dipasuk dalam Bup Ensiklopedia tu, Depha madahka pemujur tu deka nyadi peransang bala bukai kelebih agi penanyi baru ngambi bebendar agi ngangkatka pengelandik diri.
“Mayuh pekara udah nyadi dalam pengidup raban Masterpiece baka kami udah nerima 14 Anugerah sekumbang masuk dalam industri muzik Dayak tu.
“Kami mega udah nempa nama nyadi penanyi beraban Dayak keterubah ngatur konsert kediri iya nya Konsert Masterpiece Merindang Ke Bintang 1 Dekad ba taun 2019.
“Kami mega suah bekunsi panggau lebuh bisi konsert tauka pengerami besai begulai enggau raban penanyi ari menua tu enggau menua luar ngelama tu.
“Kami mega kala ngarika penanyi raban bansa Dayak rambau Konsert Rocktoberfest Borneo ba Miri.
“Lebuh nya, kami aja penanyi beraban Dayak ke bisi merindang begulai enggau penanyi bukai ari menua bukai baka ari Philiphines, Singapore enggau Taiwan,” terang Depha.
Depha mega madahka raban Masterpiece kala dibai merindang ba Kuala Lumpur enggau Brunei.
Ku iya, pemujur Masterpiece terubah iya masuk dalam industri muzik Dayak tu udah ngerandang jalai enggau nyadi peransang ngagai rebak baru berani nguji mantaika pengelandik enggau pemanah patah nyawa sida.
Sebedau tu, Depha kala madah raban Masterpiece merambu deka mansutka dua buah lagu taun tu pengudah lagu Redak Seribu ti pansut kena 16 April 2020.
Lagu Redak Seribu tu mega udah dipeda lebih ari 5.6 juta ba Youtube Channel Depha Masterpiece lalu lama udah ngempu penuduk lumur satu dalam Anugerah Tusun Sapa Juara (ACSJ).
Tebal agi, bala peminat ba media rama meri tabi puji ngagai Depha lebuh iya mantaika berita manah nya.
Siku penguna ba ruai Facebook benama Caroline-Lyn Mayau madah, meri tabi puji ngagai nuan Depha, nuan tu mih entara orang ti betuah enggau arapka Tuhan merekat semua pengawa nuan ngangkatka muzik kitai Iban.
Pia mega, siku penguna benama Ini Nia Amit madah, taja aku enda rinduka lagu berentak rock tang aku rindu ninga lagu Redak Seribu ari raban Masterpiece, meri pengaga ati ngagai nuan lalu terima aja berita manah nya.
Siku agi penguna benama Elevon Runggai madah, meri tabi puji ngagai raban Masterpiece laban kualiti lagu kitai chukup manah lalu kita endang patut nerima pekara baka tu, bedau kala meda raban bansa Iban bulih utai baka tu.
NGERANDANG JALAI
Nambahka nya, Depha ngarika sida sebuat meri besai terima kasih ngagai sida sebilik laban udah nyukung pejalai sida dalam industri muzik tu.
“Terima kasih mega ngagai bala kaban enggau peminat Masterpiece, kami meruan baruh ati enggau siru ngenang sukung ari kitai ari terubah kami masuk dalam industry muzik Dayak nyentuk diatu.
“Pemujur enggau anugerah ke kala diterima kami ngelama tu ukai ungkup kami aja tang ungkup semua kitai ti udah bebendar nyukung enggau ngangkatka industri muzik Dayak.
“Terima kasih nuju bala peminat, nadai ngira ke lama enggau baru laban meruan nyukung pejalai enggau rindu ninga lagu kami ngelama tu.
“Jaku terima kasih tu mega nuju bala DJ Radio enggau pemberita ti seruran nemu pejalai kami dalam industri muzik Dayak, sukung ari kita nya mih nyadi peransang ngambi terus ngaga lagu.
“Nya alai, aku ngarapka bala penanyi meruan segulai sejalai sereta nyukung pangan diri sereta ngajihka kitai bela mansang lalu seruran bulih penemu ngaga lagu baru, sama mih kitai besaup nyungkak industri muzik di menua tu.
“Pesan aku, anang putus pengarap nyema bisi sekeda lagu ditengkebang enggau disadaka kitai enda entu didinga orang tang pajuka aja pengerindu kita.
“Pia mega, anang enggai bekunsika cherita ngagai bala peminat kelebih agi berita ke meri empas positif sereta besampika semua bala penanyi gerah bulih jereki ba pengawa belagu tauka sebarang pengawa dikereja kita.
Ba lansa sama, Depha madahka sida berasai gaga ati laban diatu mayuh penanyi baru berani mantaika diri ba dunya pemerindang.
Ku iya, rebak baru diatu chukup landik lalu ukai semina belagu ba siti rentak aja tang ulih nitihka pemansang muzik baka rentak ari menua luar.
“Ambika chunto, kitai diatu udah bisi penanyi rap enggau Hip Hop, tu kita pemansang baru dalam industri muzik kitai nipakka arus pemansang.
“Aku ngarapka sida ngena manah peluang tu nyadi singkang keterubah ngerembaika pengelandik dikembuan sida tu, mayuh pelasar ulih dikena sida mantaika pengelandik diri.
“Bala penanyi baru mega mesti nyaga diri kelebih agi seruran nyaga kaul enggau bala peminat ba media rama, kita mih rebak ke deka nampung pengawa kami dudi hari,” ku jaku lalau Depha nuju semua penanyi baru.
MERINDANG KE BINTANG
Ba taun 2009, raban Masterpiece mujur mansutka album Merindang Ke Bintang baka lagu Sinu, Nadai Benci, Malam-Malam, Kumang Mimpi, Bulat Ati Ku enggau Misteri.
Ba taun 2013, raban Masterpiece mujur mansutka Album Rock & Roll baka lagu Aku Benci, Badu, De Ja Vu, Gaun Putih, Intan enggau Batu, Kumang Seari, Nyaga Negeri, Sembilan Bulan, Nyawa Aja Tanya enggau Terebai.
Ba taun 2014, raban Masterpiece mujur mansutka lagu Berami ba Ati Nuan dalam Gawai Kompilasyen enggau lagu Ngap Sayot dalam jaku Melayu Sarawak.
Ba taun 2015, sida mujur mansutka album dikumbai Ngarapka Nuan Nikal Pulai ke alai lagu ke bisi dipasuk dalam album tu iya nya lagu Ngarapka Nuan Nikal Pulai.
Nangkan nya ba taun 2016, sida udah mansutka lagu Anak, Berani Mati, Drama Ku Ingat, Enda Aci Lah, Kaban, Nadai Ati Berami, Nuan enggau Aku, Sakam, Siku Dalam Seribu bepadu nyawa enggau Lyssa Jean, Badasman enggau ke bukai.
Ba taun 2017, sida mujur mansutka lagu rumpas iya nya Perecha seraya ba taun 2018, raban Masterpiece mujur mansutka album Ensera Paragon baka lagu Anang Irau, Apokalips, Bintang Jalai, Daliyah, Diva Enigma begulai enggau Josephine Jurie sereta Kunci Meligai Ati.
Kena 9 Disember 2011, Masterpiece udah dikangau merindang ba Stadium Perpaduan, Kuching rambau Konsert Rock Borneo Tebilang 2011 disukung vokalis Raban Search, Amy lebuh merindang kediri ba Kuching.
Bala penanyi bukai ti bisi dikangau iya nya Stevenson, Ricky Andrewson enggau Winnie Albert.
Lebuh nya, Masterpiece enggau Amy udah bekunsi panggau keterubah iya lalu sama nyadaka lagu tebilang Search nyengkaum lagu Isabella, Pawana enggau Tiada Lagi.
