ARTIKEL

Kisah Menggong 2 : Trajedi betimbak ba Sungai Siput enggau Batu Arang

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

Tusun 2

Bulan September 1948 dia menua Malaya benung sigau beduduk ari Parti Komunis Malaya (PKM) ti bebendar deka ngerampas kuasa ari perintah Tanah Melayu.

Maya nya mih, raban Iban Tracker mayuh dianjung perintah koloni di Sarawak ke Malaya nyaup ngaluska menua nya ari kena terus keruga raban komunis.

Urung pukul 12 tengah malam kena 12 September 1949, Tracker Menggong anak Panggit ngepunka tanggung pengawa keterubah iya nyadi Tracker ngiring sebuah platun nuju sebengkah kandang kampung ba Kuala Kangsar.

Maya umur baru manggai 15 taun, Menggong udah megai tanggung pengawa ke chukup besai nyadi pengerembang babas sereta bejalai dulu ari bala kaban platun Unit Gurkha ke bukai urung lima meter ba luan. Ba umur ke agi tubah biak dia iya udah sanggup berambunka nyawa diri nyidi bekau munsuh.

Bejalai ngerembang malam nadai belampu pichit ukai pengawa ke muntang, tang nya mih utai ke dikereja Menggong. Ari bekau kaki enggau pendiau anak kayu ke bisi rebah kena rembang Menggong ngelala kandang endur nya endang amat bisi ditujah munsuh.

Menggong anak Panggit

Pengudah Menggong madahka kandang endur nya bisi munsuh, dia Tuai Kompeni terus ngatur strategi mechahka raban platun ngagai tiga raban.

Lebuh sida nyau deka datai ba tuchung bukit, enda memukai dia sida terus kena timbak munsuh ari atas bukit. Menggong melabaka senyata ke dikena munsuh nimbak sida bansa brengan, rifle enggau stengan. Ari munyi letup senapang munsuh, Menggong melabaka penyampau komunis ke nyerang sida malam nya urung 50 iku.

Sida terus bebalas betimbak enggau pangan diri. Nya mih peneleba keterubah Menggong betimbak enggau munsuh. Lepas urung 20 minit udah betimbak, munyi letup senapang munsuh pan nyau majak kurang. Pegawai Koloni terus ngasuh raban sida Menggong neruska nyerang munsuh nengah chara kelinggi dikena nyekat raban munsuh nikal.

Maya hari nyau kerebak tawas sida terus meresa palan nya. Asil diperesa dua iku ari raban platun midang kena timbak lalu penyampau munsuh ke mujur didengah sida malam bisi 14 iku.

Pemujur bedengah munsuh malam nya endang chukup ngemegahka ati Menggong enggau raban platun sida.

Bekau ari pemujur operasyen keterubah nya, Menggong terus gagit deka nandu pemujur nya ba maya bukai. Iya nyau nadai agi berasai kesal tauka nangi betempur enggau munsuh.

Nangkan ke nya ba kena bulan September, sida sida Menggong bisi betempur enggau munsuh ba Sungai Siput. Ba trajedi Sungai Siput, bisi enam iku munsuh mati kena timbak sida. Dua iku ari munsuh ke mati nya, asil kena timbak Menggong empu laban ke endang dulu ari orang bukai tepedaka munsuh.

Enti siang hari, ku Menggong takah iya dulu ari raban platun bukai urung 20 ngagai 30 meter penyauh dibanding enggau maya malam hari. Enti malam hari iya diasuh semina betakah tiga ngagai lima meter dulu ari orang bukai. Asil takah penyauh ke baka nya, ulih nyeliahka raban munsuh nemu penatai raban Iban Tracker ti datai nyidi.

Enda datai tiga bulan bekau ari pemujur bedengh dua iku munsuh, Tracker Menggong terus dikearapka Markas Tinggi Kem Soldadu Darat British Timur Jauh di Singapore. Pemujur nya mega ngujungka Menggong diengkah ba unit infantri ke baru begulai enggau raban soldadau koloni ke baru ari menua Scotland ungkup operasyen ngaluska kandang kampung ba menua Selangor dikumbai batalion Kedua Rejimen Scot Guard.

Raban sida dianjung ngagai Kem Batu Arang, Selangor nyaga sitak Hutan Hulu enggau Kuala Selangor.

Dalam bulan Januari 1949, kem sida Menggong nerima berita baru bekaul enggau raban munsuh bisi deka ngelawa kandang kampung ke dijaga sida. Sida terus nyikap diri deka ngaga serang belalai.

Semalam-malam sida ngipa munsuh, kira pukul 4 dini hari bejaga dia Menggong ngasaika bisi daun babas beguyap baka ke dirembang orang. Menggong terus madahka ketuai platun awakka bela ngadang.

Ari jauh Menggong bisi tepedaka 10 iku munsuh benung bejalai seraya mai mak ba belakang dipelaba keresa dikena beridup dalam babas. Sida seraban endang udah ngadang. Maya nya bisi empat iku munsuh nuju mua ke alai Tracker Menggong ngipa. Maya nya sida seraban semina ngantika gerah ari ketuai endur ngachitka senapang.

Meda takah munsuh nyau majak ngansak sesemak kira lima meter ba mua kami. Nadai betangguh Tracker Menggong anak Panggit terus ngachitka senapang lalu ditandu bala bakih ke bukai.

Urung 10 minit udah nya, sida Menggong ngetu nimbakka senapang. Raban munsuh dipeda nyau bekesebar berumban ngelarika diri. Pengudah hari kerebak tawas, sida terus meresa palan nya lalu tepedaka dua iku bangkai munsuh mati kena timbak. Maya nya, Menggong chukup gaga laban nadai siku sida seraban bakal.

Bekau ari pemujur nya, dia Sarjan William terus ngasuh sida nyidi bekau munsuh. Bisi dua sekysen platun diasuh bebagi nyidi munsuh penyauh 500 meter. Taja pia, sida nadai tetemuka munsuh ke udah lari jauh diumba gaya babas ke balat repa. Urung pukul 11 pagi, operasyen nyidi munsuh diketu lalu sida mansutka diri ari kandang kampung.

Betakah dua bulan udah nya, dalam tengan March 1949 menua Malaya terus angat ketegal komunis ti bebendar deka ngalahka Tanah Melayu. Penyampau komunis maya nya mega majak mayuh, ari urung 4,000 iku dalam bulan June 1948 nambah ngagai 12, 000 iku.

Entara kandang kampung ke diperitaka udah dipasuk bala komunis iya nya Kanching, Rawang, Serendah, Hulu Yam, Kampung Galau Rasa, Kuala Kubu, Kerling, Tanjung Malim enggau Slim River di Perak.

Kelimpah ari nya, raban komunis mega diperita bisi neresa kandang kampung Batang Berjuntai di Kuala Selangor. Menggong maya nya begulai enggau soldadu koloni nyaga Kem Batu Arang. Tanggung pengawa sida Menggong mutuska kaul raban komunis enggau ‘tali barut’ komunis sida ba Perak enggau Pahang.

Hari siti, Menggong enggau raban platun iya diasuh ngili sungai Batu Arang. Benung sida seraban ngili sungai enda memukai sida kena serang munsuh belalai. Maya nya sida endang nadai utai endur belindung. Menggong laban ke endang dulu ari bala bukai terus ngetan diri sereta malas timbak bala munsuh.

Menggong ngasaika sekumbang udah gawa, nya mih maya betimbak ke chukup rindu. Nadai ngasai ngeri enggau bai ati ransing deka munaska munsuh sida seraban terus malas timbak bala munsuh. Pengujungka sida pan ngetu betimbak pengudah urung pengelama setengah jam.

Pengudah diperesa sida sedar bala komunis udah ngelarika diri pengudah nguji nyerang belalai. Maya nya, kami tetemuka dua iku bangkai munsuh mati kena timbak ba tisi pun getah. Munsuh dua iku nya mujur ditimbak Menggong ba pun sida betimbak.

Bekau darah munsuh mami aja endur nya, tang sida ke bakal mujur ngelarika diri. Udah nya, sida terus nguji nyidi bekau munsuh tang nadai temu. Sida Menggong terus mulaika diri baru ngagai kem. Pemujur sehari nya, meruan dikeingatka Menggong lalu bisi ditusuika iya nengah surat ke dikirum nuju apai enggau indai iya ke diau ba Nanga Embaluh, Kalimantan Barat, Indonesia.

Kisah Menggong tu dilekaka aku dulu naka tu, minggu baru kitai nampung iya baru ngenang trajedi sida seraban kena serang komunis belalai maya dalam trak lebuh ba rantau jalai ari Kuala Lumpur deka ke Rawang ba jalai besai Bukit Kanching (diatu disebut Templer Park) enggau pemujur sida ngalahka komunis ba operasyen kampung Batang Berjuntai.

BERITA LAIN

BERITA TERBARU