ARTIKEL

Kisah Menggong 3 : Ukai ngiga pangkat enggau nama

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

“…nurun gawa kelia endang ukai ketegal dekaka pangkat, ngiga rita enggau ngulihka nama. Tuju ati bala Iban Tracker, ku Menggong iya nya semina siti, deka meda raban munsuh ke ngeruga menua ulih dipunas ngambika menua ulih likun sereta lantang.”

TUSUN 3

Trajedi kena serang munsuh belalai ba sungai semak palan ngali Batu Arang terus nyadi buah mulut sida Menggong anak Panggit. Penyadi nya mega ngundang ati sinu lebuh sida ingatka sekeda bala bakih ke bebadi nyawa kena timbak komunis.

Taja pia, trajedi nya enda ngasuh ati Tracker Menggong mantul neruska misyen ngetanka menua ari terus dikeruga raban komunis.

Hari siti, raban sida Menggong diasuh bekemaska barang pemakai ungkup bekal dua hari. Pejalai sida serak tu betuaika Sarjan William nepan dua buah trak diasuh ngesah penusah ke nuntung raban polis polis ti kena serang munsuh belalai lebuh ba rantau jalai ari Kuala Lumpur ke Rawang.

Diperitaka enam buah trak ke ngundan urung 60 iku raban polis kena serang komunis ba jalai raya Bukit Kanching (Templer Park) urung pukul 5 pagi ngujungka enam iku ari raban polis ke nepan trak nya bebadi nyawa, kelimpah tiga buah agi trak tepawah ke lebak semuti enda labuh ke sungai.

Nitihka penerang bisi setengah sida polis betimbak enggau komunis, sebedau komunis ngelarika diri ngagai babas. Sida polis tu kebendar deka bejalaika pansik tumu bekaul enggau komunis sebedau pengawa nya disambung sida Menggong.

Bekau ari penyadi nya, Tuai Polis Rawang enggau Sarjan William pan setuju ngatur operasyen nyidi komunis ba semak bukit enda jauh ari palan trajedi kena serang belalai nya. Menggong pan diasuh nyadi Tracker ngerandang jalai nyidi bekau komunis.

Bisi 10 meter penyauh Menggong dulu ari orang bukai, iya endang bisi tepedaka bekau kasut munsuh. Bisi maya iya ngetu beratika pendiau daun babas ke mayuh melepi kiba kanan bekau kena rembang munsuh lari.

Kira lebih tiga jam udah bejalai neresa kampung, sida nujah siti bukit ke chukup renjan. Jam senutuk bendar nunjukka pukul 5 lemai, enda memukai dua iku munsuh dipeda dedegi megai senapang ba baruh siti pun kayu besai. Dua iku munsuh dipeda Menggong baka benung bejejaga.

Menggong terus engkundukka pala lalu nyubuk ulah munsuh. Dua iku agi munsuh dipeda Menggong benung duduk ba bandir kayu. Takah penyauh Menggong enggau munsuh semina 10 meter.

Takah ti kelalu semak ngujungka Menggong enda ulih madah ngagai raban platun ba belakang. Enti iya bemunyi inggar, tentu iya didinga munsuh. Menggong berunding ngaga pemutus kediri.

Senyata ke dibai Menggong iya nya Rifle Mark 5 udah dituntungka ba bahu. Pengudah diiching manah, Menggong terus ngachitka senapang enda ngetu nuju munsuh.

Dua iku munsuh terus melempai tesungkur ke tanah kena timbak Menggong. Dua iku agi nyau tebamba duduk ninga letup senapang Menggong. Menggong terus nadai ngetu ngachitka senapang. Peda Menggong tesungkur baru dua iku munsuh kena timbak iya.

Bala soldadu ke entudi udah datai lalu nyaup Menggong nimbak munsuh. Semak 20 minit sida betimbak pangan diri, auh letup senapang pan tenai. Munyi senapang munsuh nyau nadai agi didinga. Sida Menggong andal munsuh udah lari.

Pengudah diperesa, empat iku bangkai komunis ditemu semak bandir kayu. Keresa sida ke ditemu empat iti senapang Rifle Mark 5, pelurp, kimbis enggau barang pemakai muat empa 50 iku.

Urung pukul 6 lemai, bilun engkabang ari Kem Sungai Besi pan datai. Bangkai komunis enggau keresa pemakai sida dibai ngena bilun. Udah nya, langkau kimbis komunis terus ditunu.
Udah nya, semalam-malam sida sida Menggong terus nyidi napatka komunis ke lari tang nadai temu. Chukup pedis ngerembang malam umba babas balat repa.

Nyau deka kerebak tawas hari siti, urung pukul 6 pagi baru sida Menggong mujur pansut ari kampung Bukit Kanching rembus ba jalai raya Kuala Lumpur-Rawang.

Ba jalai raya nya, beberapa buah trak udah nganti. Sida laban ke udah ikak terus nepan trak, dalam ati Menggong berasai puas udah mujur bedengah empat iku munsuh.

Pemulai sida Menggong ke Kem Batu Arang sida Menggong terus dirami nengah pengawa merarau.

Bulan June 1949, genap 10 udah gawa nyadi Tracker tang mayuh pemujur udah dijapai raban Iban Tracker.

Hari siti, sida Menggong diasuh nurun operasyen ngagai siti palan baru iya nya Batang Berjuntai di Kuala Selangor.

Pejalai sida betubun 25 iku nurun dibekalka enggau senyata Rifle Mark 5. Baka selama, Tracker Menggong dulu ari bala bukai nujah kebun getah lama. Agi meruan peku getah nadai digumpul ngerimbai pun nyangka orang ke ngempu pun getah nyau enda berani agi nurun nangkal ketegal keruga raban komunis.

Tracker Menggong terus bejimat bejalai, enda lama udah nya iya bisi tepedaka ayas mensia betakah 15 meter di mua. Sida nya dipeda bepekayan khaki bechura kunyit enggau megai senyata. Pengudah diperati amat sida nya bisi tiga iku.

Menggong terus meri tanda kelai ngagai Sarjan William ke entudi iya. Ari kelai jari Sarjan William, Menggong nemu iya terus diasuh nimbak. Nadai betangguh agi, Menggong terus ngachitka senapang. Bisi lima belas kali peluru Menggong udah datai ba munsuh dipeda dua iku munsuh rebah.

Komunis pan malas serang nengah chara nyelabu ngapa. Kira lima minit udah nya, munyi senapang munsuh nadai agi didinga. Sarjan William terus ngasuh raban soldadu nguji ngagai munsuh.

Pengudah palan nya diperesa bisi tujuh iku munsuh mati kena timbak. Dua iku ari sida asil kena timbak Menggong. Barang komunis terus dirampas nyengkaum beberapa kampit gula, berau, sardin ikan, periuk mit enggau ubat.

Kira pukul 3 lemai, bilun engkabang datai ngelawa palan endur sida Menggong betimbak enggau munsuh.Nya pemujur ketiga dijapai sida Menggong seraban lalu berita nya meri pengaga ati ngagai Pegawai Pemerintah batalion kedua Rejimen Scot Guard, bepangkat leftenan kolonel enggau pegawa ke bukai.

Pemujur sida nya terus dirami ba Wisma Bentara Pasukan di Kem Batu Arang. Bekau ari pemujur Golf Kompeni munuh tujuh iku munsuh nya, ketuai platun iya nya Sarjan William terus diberi tanda pangkat bujang berani Midul Militari (MM). Midul nya disuaka Tuan Rajah King George ke VI.

Tracker Menggong berasai temegah mega ketuai iya nerima tanda basa nya. Maya nya, Menggong empu udah mujur nimbak 10 iku munsuh dalam enam kali betempur.

Pemujur nya terus nyadika peransang Menggong enggau bala Iban Tracker enggau soldadu ke bukai. Taja pan ari segi japai pengulih munsuh ke ulih didengah Menggong, iya kebendar lebih patut diberi pangkat basa ketegal pemerani. Tang nama daya laban Sarjan William ti nyadi ketuai lebih tampak ba mata pemesai soldadu British maya nya lalu pengulih Iban Tracker, baka Menggong dipeda sepiak mata aja taja pan pemujur dijapai Menggong maya nya ngelui ari semua kaban platun sida.

Tracker Menggong tetap enda tendur semangat bejalaika sebarang aja pengawa ke diberi laban iya nurun gawa kelia endang ukai dekaka pangkat, ngiga rita enggau ngulihka nama. Tuju ati bala Iban Tracker, ku Menggong iya nya semina siti, deka meda raban munsuh ke ngeruga menua ulih dipunas ngambika menua ulih likun sereta lantang.

Nya alai, beserimbai enggau Hari Kebangsaan 2021 ke diintu kena 31 Ogos tu kitai bela besampika semengat raban bujang berani menua ke udah midang ketegal ngetanka menua kelia lantang begulai enggau Tuhan di serega.

Pia mega, ngagai raban bujang berani ke agi idup kitai mega besampika sida meruan gerai sereta nerima perati ari semua raban bekaul nyengkaum perintah. Beri mih sida bantu tauka pangkat pengingat nitihka pematut dikena ngingatka jasa sida ke udah bebendar ngetanka menua. Anang nganti sida udah midang baru nama sida dikelala, dikenang sereta dipegendang.

BERITA LAIN

BERITA TERBARU

Tiga bot nelayan ditahan APMM

MIRI: Tiga bot nelayan tempatan bersama 1,000 kilogram ikan dirampas oleh Agensi Penguatkuasaan Maritim Malaysia (APMM) Zon Miri di kedudukan 3.3 batu nautika barat laut

Geng Piji tumpas

KUCHING: Geng Piji yang aktif mencuri kenderaan selain terlibat dalam kes pecah rumah, samun dan curi kabel akhirnya tumpas apabila ketua termasuk 11 ahlinya dicekup