ARTIKEL

Kisah Menggong 5 : Landik, sikar sereta lansik

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

Pengelandik, penyikar enggau pengelansik Tracker Menggong anak Panggit nyidi bekau munsuh jeman menua agi sigau dalam bulan Ogos 1949 endang nadai endur manding.

Menggong sedar tanggungpengawa nyadi Iban Tracker chukup besai. Pengawa nya nadai tau ilap. Mimit ilap ulih ngenusah semua bakih dalam platun.

Nitihka penerang ditampung ari (Johari : 1997) maya ba sebengkah operasyen di kampung galau, Serendah, Hulu Selangor dia Menggong mujur bedengah tiga iku munsuh. Penyampau munsuh ke bebadi nyawa kena timbak raban platun sida Menggong maya tu bisi enam iku.

Ungkup Menggong aja, bisi 18 iku munsuh udah mujur ditimbak iya sekumbang udah nyadi Iban Tracker naka Ogos 1949. Penyampau nya chukup besai reti ngagai Menggong, tang taja pia iya meruan ngembuan ati ke baruh nadai kala ngeninggi diri asil ari pemujur nya.

Enti nitih pemayuh dengah nya, Menggong endang patut ditikika pangkat tauka bulih midul bujang berani. Tang Menggong enda kala ngandalka diri diberi pangkat laban juluk ati iya nyadi soldadu ketegal deka ngetanka pengelikun menua enggau munaska semua munsuh.

ALBUM…ASP (B) Menggong anak Panggit enggau bini iya Hilda Tayut anak Jayan begambar kenang pengudah nerima midul basa ‘Ahli Mangku Negara’ ari D.Y.M.M Seri Paduka Baginda Yang di-Pertuan Agong, Tuanku Yahya di Istana Negara ba taun 1978.-Gambar Facebook Maria Menggong.

Pun taun 1950, Menggong enggau semua bala bakih ke gawa ba Kem Batu Arang diasuh mindah ngagai Kem Tampin, Negeri Sembilan laban kem lama sida nya deka dipegai unit infantri ke baru.

Kena 14 Februari 1950, Menggong berengkah bejalaika pengawa nyidi munsuh ngagai sebuah kebun getah di Ladang Gadis ba pelilih Jempol.

Lebuh bejalaika pengawa nyidi munsuh ba endur nya, enda memukai sida Menggong betembung enggau munsuh ke datai ari atas bukit. Urung 20 iku komunis dipeda Menggong iya terus nyelinting ke senapang Rifle Mark 5 nuju munsuh. Peda tak lalu tesungkur siku munsuh.

Sida bebalas nimbak pangan diri, kenyau pengelama udah betimbak dia bala komunis pan mupuk ngelarika diri. Kira penyauh 500 meter sida ngagai munsuh ke lari tang nadai temu. Udah nya sida ngetu lalu nikal pulai ngagai palan pun endur betimbak. Dia sida meda siku aja munsuh mati ditimbak.

Senapang ke dikena munsuh ke mati nya sepuchuk Stengan ke ngundan 80 igi peluru. Udah nya, dalam beg mak iya bisi gari, berau enggau ikan sardin. Munsuh ke parai terus dibai ngena bilun engkabang ngaga Balai Polis Tampin.

Operasyen nya kebendar, pengawa keterubah Menggong begulai enggau raban Golf Kompeni Batalion Kedua, Rejimen Soct Guard. Menggong chukup teperansang enggau pemujur ba palan baru nya ngujungka penyampau munsuh ke udah didengah iya bisi 19 iku.

Udah nya, kena 23 April 1950 ba sebengkah operasyen di kampung Rompin di Gemas, Negeri Sembilan Menggong sekali agi betembung enggau seraban munsuh ke benung bejalai neresa babas.

Maya nya sida nyelinting munsuh nitihka gerah ketuai platun. Ketegal berumban nimbak nadai mayuh munsuh ulih timbak sida. Semina siku aja mujur kena timbak. Udah munsuh bukai mujur ngelarika diri seraya nimbak ngapa. Munsuh ke mati nya, ngena senapang Rifle Mark 4 ke ngundan 30 igi peluru.

Nangkan ke nya kena 29 April 1940, raban sida Menggong diasuh bejalaika operasyen ba kampung Bahai di pelilih Jempol berengkah ari pukul 11 pagi.

Lebuh ke bejalai bejimat nyidi munsuh, enda memukai Menggong tepedaka tiga iku munsuh benung bejalai laju. Menggong nadai kakang ngachitka senapang. Siku ari munsuh mujur ditimbak Mengggong. Dua iku agi munsuh nguji malas timbak tang enda mujur laban ke nimbak ngapa nadai orang dipeda.

Raban bukai ba belakang terus nyaup Menggong malas timbak munsuh. Urung lima minit sida betimbak munsuh pan ngelarika diri.

Taja operasyen nya enda bedengah mayuh munsuh tang ati Tracker Menggong tetap gagit neruska pengawa munaska munsuh. Maya nya umur iya udah manggai 17 taun lalu penyampau munsuh ke udah ulih timbak iya bisi 20 iku.

Ba pun taun 1951, Tracker Menggong sekali agi diasuh mindah ngagai kem baru iya nya Kem Kemayan di Pahang.

Pengudah beberapa minggu ba kem baru, Tracker Menggong enggau bala bukai diasuh nyerang munsuh belalai ba kampung Mentakab. Pengawa nya dipejalaika malam hari lalu semua sida ke bejalaika operasyen nya diasuh makai pil enda ngasuh ngantuk.

Urung pukul 1 malam, sida betachah enggau munsuh pengudah panjuk flair trip sida kena indik munsuh lalu meletup. Maya palan nya terang enda lama, sida Menggong terus nimbak munsuh ngena peluru tracer.

Siku munsuh mujur ditimbak Menggong malam nya, dua iku agi ditimbak bakih ke bukai. Nya entara pemujur baru Menggong ba kem baru nya lalu penyampau munsuh ulih timbak iya terus nambahka ngagai 21 iku.

Udah nya, dalam bulan Mei 1951 ba sebengkah operasyen ba ladang getah semak entara menua Pahang-Negeri Sembilan raban sida Menggong sekali agi betachah enggau empat iku munsuh.

Ba operasyen nya bisi berekat peneleba, penyikar enggau pemerani Tracker Menggong mujur nimbak dua iku munsuh.

Dua iku agi munsuh mujur ngelarika diri. Munsuh ke mati nya besenjataka dua puchuk Stengan ke ngundan 120 igi peluru idup. Asil ari operasyen nya, 23 iku munsuh udah mujur ditimbak Menggong.

Nangkan ke nya, kena 3 Ogos 1951 operasyen platun sida Tracker Menggong nyapai pemujur ke chukup nyulut. Platun ke betuaika Sarjan Mac Allen mujur munuh enam iku munsuh. Sida betimbak enggau munsuh urung pukul 8 malam nengah sebengkah operasyen nyerang belalai.

Dua iku ari munsuh nya asil ditimbak Menggong. Pemujur nya ngujungka penyampu munsuh udah ditimbak Menggong bisi 25 iku.

Udah nya, kena 20 ogos 1951 ba sebengkah operasyen ke dipejalaika ba sebuah kampung di Temerloh raban sida Menggong sekali agi betachah enggau 30 iku munsuh.

Asil ari operasyen nya, siku aja munsuh mujur kena timbak, udah nya sida ke bukai mujur ngelarika diri ngagai babas. Keresa munsuh ke ditemu sida iya nya senjata Stengan ke ngundan 150 igi peluru.

Kisah Menggong dileka aku naka tu dulu, minggu baru kitai nampung iya baru ba cherita Tracker Menggong ditikika pangkat ngagai Lans Koperal sereta dipindahka gawa ngagai Batalion Satu Rejimen Cameronion Scottish Rifle Light Infantri ke bepengkalan ba Kem Segamat, Johor.

 

BERITA LAIN

Pemansang asil nagih MA63

MIRI: Pemansang besai ti udah dijapai Sarawak kandang beberapa taun ke udah asil ari nagih hak di baruh Sempekat Malaysia 1963 (MA63). Kaban Kunsil Nengeri

Solar melepung HEP Batang Ai

BATANG AI: Projek ladang solar melepung diu Tekat Hidroelektrik (HEP) Batang Ai deka dikerembai, ngena 60 peratus ari 8,500 hektar pemesai tekat ai nya. Premier

Graduet meseti bisi pengelandik

KUCHING: Sapit Menteri Pelajar, Inovasyen enggau Pemansang Penau, Datuk Dr Annuar Rapaee nyemetak madah ke pengelandik diri beguna endar ngagai bala graduet kelebih agi ba

IPTN agi dikerandau enggau KPT

KUCHING: Pengawa numbuhka Palan Pelajar Tinggi Nengeri (IPTN) agi dikerandau ba renggat Opis Menteri Pelajar Tinggi (KPT). Sapit Menteri Pelajar, Inovasyen enggau Pemansang Penau, Datuk

Semilan PATI diburu pulai

KUCHING: Soldadu Darat Malaysia (TDM) mujur nagang semilan kampar (PATI) ari Indonesia ari tama ke menua tu di Biawak, Lundu kemari. Markas 1 Divisyen ba

BERITA TERBARU