Kisah pemar ditapi Misha sekumbang ngaga filem Belaban Hidup : Infeksi Zombie

Bepun ari pengagit ati deka ngaga filem dalam jaku Iban ngujungka penulis skrip filem Belaban Hidup : Infeksi Zombie Misha Minut Anak Panggau,49 taun madah diri betapi enggau bemacham penguji sebedau filem tu mujur digaga.

Lebuh dirandau Suara Sarawak, anak lumur empat ari lapan iku diri menyadi tu nusui diri ngambi awak lima taun endur betapi enggau bemacham pemedis enggau penguji ti ngujungka filem Belaban Hidup tu diatu majak dikelala sereta udah mujur menang tiga anugerah ba renggat entarabansa iya nya di Singapura, Rusia enggau Peranchis.

“Sebedau ngaga filem tu, pengawa aku semina nyadi tukang nganta ke mua orang kelimpah nyaup Ray Lee ngaga filem berantu pandak.

“Mulai pengingat keterubah iya nama filem tu iya nya Belaban Idup sebedau ditukar ngagai Dendam Gadang udah nya ditukarka baru ga ngagai Belaban Hidup.

“Kebuah aku milih nama Belaban Hidup laban tu siti ari ‘strategi’ dikena aku dalam ngelakuka filem tu laban mensia mayuh tauka peminat deka jampat agi meretika leka jaku dua iti nya iya nya ‘Idup’ enggau ‘Hidup’.

Misha Minut

“Kekadang sinu ga ngenang, sepengelama lima taun nembuka filem tu, chukup mayuh pemar udah diasaika aku.

“Tang bai ati gagit deka meda filem digaga dalam jaku Iban, dia semua pemar nya belubah-lubah ulih teputar,”ku iya.

Peranak asal ari Limbang tu mega madah diri kala nerima jaku pejah ti nguji ngelemika semengat iya deka ngaga filem Belaban Hidup.

“Sampai didinga pending aku empu orang nyebut munyi tu ; nadai tetuju begagaka filem laban nya semina dikena ngemuaska ati diri aja, ku jaku kedua.

“Endang amat maya ngaga filem tu pengagit enggau pengaga tetap bisi, tambah mega sekumbang ngaga filem semina kami ke gawa endang bela bisi nerima gaji ninting bulan,”ku iya.

Pemungkal iya suba, ku Misha sebedau bekerejasama enggau Ray ke mega nyadi direktor dilem tu sida endang nadai bulih sebarang bantu. Kenyau pengelama udah nya baru bisi bantu ari Serakup Pemansang Filem Nasional Malaysia (Finas).

“Terubah iya maya agi nadai puku ke besai dikena ngaga filem tu, kami duai Raya semina nguna kengka pemisi diri.

“Nya kebuah bala pelakun ke dibai kami duai melakun pan semina bala bakih besemak aja kelimpah bala menyadi aku empu iya nya Cassidy Panggau enggau bini iya, Bidah Pengulu.

“Bisi ga orang nanya aku,nama kebuah bala pelakun dalam Belaban Hidup nadai mayuh kitai Iban tauka Dayak.

“Aku kala ngiga bala pemain industri kreatif,pelakun tauka artis Dayak belakun dalam filem Belaban Hidup kelimpah ngaga ‘posting’ ba Facebook.

Bala raban produksi benung ngaga video dalam babas.

“Tang semina siku dua aja ti nyanggup sereta ulih limpang ngenataika diri. Kitai sama nemu dalam industri tu (filem), nadai mayuh filem Iban udah digaga di menua tu.

“Taja bisi sekeda mejah madah aku enda meri peluang ngagai pelakun bansa kitai sama melakun.

“Enti nitih pengasai ati deka mih ngaga filem tauka ngeluarka filem ninting bulan, tang baka ni ku enggau bajet laban pengawa tu begunaka ungkus ti umbas iya.

“Bisi mega kedau mejah madahka skrip (dialog) dalam filem tu kekatat-katat. Terus terang, aku filem tu sigi mayuh pengurang ba senentang pekara tu.

“Jaku Iban dikena aku sigi kekadang kurang engkeman,tusun leka jaku dalam skrip mega endang jaku pasar.

Naka tu filem Belaban Hidup udah mujur menang tiga anugerah ba renggat entarabansa iya nya di Singapura, Rusia enggau Peranchis.

“Nya kebuah aku bisi nesau sebelah Facebook nguji ngigaka orang ti landik nulis skrip dalam jaku Iban tang nadai nerima sebarang timbal.

“Nyema bisi pan aku ngasaika diri enda mih ulih tebayarka penyampau bayar nitih dipinta sida,”ku iya.

Ngembuan pelajar Diploma Film Directing Asia ari Metropolitan University, Misha madah kelalu mayuh pengingat enggau peneleba pait manis diasaika sekumbang ngasilka filem Belaban Hidup tu.

Kenyau ari taun 2016 kami berengkah ngaga filem tu, kekadang ingatka pemar ditapi enda berasai naya ai mata. Chukup mayuh pemar enggau pemedis diasaika kami.

Pelakun pemadu biak, Ilam Lana beumur 3 taun.

Lebuh ngenang tudah Ilam Lana iya nya anak menyadi aku empu ke baru beumur tiga taun dibai kami reregap sebelah babas ngemujurka filem amat sinu.

“Maya nya Ilam baru beumur tiga taun tang udah dibai reregap ngerembang babas dikena pengawa ngaga video filem tu.

“Udah nya, raban bukai mega enda kurang bela ngasaika pemedis bemalam sebelah babas, bedarat nurun niki bukit, ngulu ngili sungai nitihka skrip filem nya.

“Puji Tuhan, sekumbang timpuh nya nadai sebarang pekara ke enda manah nuntung kami sebuat.

“Dini bisi nyamai maya ngaga filem tu, tang ari produksi tu aku mayuh bekelala lalu bebakih enggau mayuh orang.

“Berebak enggau nya, seninjik bendar aku bulih sukung ari bansa bukai ti berani beranak ke puku lalu pechaya ngagai kami duai Ray ngaga cherita Belaban Hidup tu.

“Tu mega nyadi siti peneleba pemadu beguna ngagai aku empu.

“Anang sesekali ngemaruhka bansa bukai laban ukai semua bansa kitai empu (Iban) ulih meri sukung baka ke diberi bansa bukai lebuh maya kitai tusah.

“Ba aku siku,nadai salah bebakih enggau sesapa asal aja ulih meri pemaik enggau penguntung ngagai kitai empu.

“Kepenudi pesan aku, arapka mensia mayuh lebih agi kitai bansa Dayak pajakka mih meri sukung penuh ngagai Filem Belaban Hidup tu.

“Pemujur ke udah dijapai kebendar ukai pemujur kami kediri, tang mega pemujur semua kitai. Filem tu mai nama, bansa enggau menua kitai dikelala sereta dikemega ba renggat dunya,” ku iya.

Ungkup penemu filem ngatika diri Belaban Hidup : Infeksi Zombie tu udah menang ba kategori Berantu enggau Sains Fiksyen ba World Film Carnival (WFC) 2021 di Singapura.

Udah nya kedua menang kategori Filem Berantu Pemadu Manah ba Karnival Filem Entarabansa di Rusia.

Ditangkan anugerah ketiga menang ba Kategori Cherita Berantu Pemadu Manah ba Festival Filem Paris di Peranchis kena malam 31 March tu tadi.

Bala kaban produksi kala bemalam ba babas, bedarat nurun niki bukit, ngulu ngili sungai nitihka skrip filem nya, ku Misha.

Suara Sarawak