ARTIKEL

Kisah siku pekebun ensabi asal ari Limbang

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Kebun ensabi Ling makin laku lebuh seminggu iya nyual manggai 400 kilogram (kg) ensabi.
Gangging@Ling Sanggau, asal ari Rumah Panjai Melaban, Medamit, Limbang madah, iya diatu diau ba Puchong, Selangor kenyau ari taun 2005.

Ku Ling, iya ngentapka diri ba Puchong laban belaki jadi enggau China asal ari Seremban lalu nitihka laki iya.

“Aku terubah ngelala laki aku nya suba maya agi gawa ba Brunei.

“Pulai ngagai Malaya ba taun 2005, dia kami duai mega bisi muka bengkel entukar kediri empu di Puchong, Selangor lalu ngentapka diri ditu.

“Gaya pengidup ditu manah laban ba aku, ditu nyamai agi ngiga penatai pemisi.

DANDANG BESAI…Pemayuh ensabi ditanam Ling ba Puchong, Selangor.

“Taja menua besai enggau begunaka besai belanja tang bemacham chara nambahka penatai pemisi ditu.

“Tambah mega, aku diatu nyau bekebun ensabi dandang besai, datai beratus kilogram seminggu ensabi ulih dijual aku,” ku Ling ngepunka randau enggau Suara Sarawak.

Ling madahka iya berengkah bekebun ensabi nya ba taun 2013 suba ba tanah pemesai 2 ikar.

Iya mega madah, terubah bekebun ensabi suba, iya nginjau kebun tauke bansa Melayu ke dikelala iya tang diatu iya udah nyuwa tanah kediri endur bekebun.

KEBUN ENSABI

“Aku berengkah ngepunka pengawa nanam ensabi tu pengudah aku bekelala enggau siku tauke kebun bansa Melayu semak rumah aku empu.

“Pemuas ke berandau, nyau diambu seduai melaki bini ke anak ga tudah aku.

“Nyau kelama udah bekelala sereta nyau teleba begulai enggau seduai, aku nyau berunding deka ngasuh seduai nanam ensabi ke aku.

“Kebuah pia laban lebuh nya aku bisi mai leka ensabi ari Limbang tang enda nemu ba dini endur deka nanam leka ensabi nya.

“Nasip amat ga seduai setuju lalu berengkah nanam ke aku leka ensabi nya.

“Tiga minggu udah nya, ensabi aku nyau tau diambi lalu galak amat laban udah mansutka 50 kg ensabi lalu aku enda nemu baka ni deka ngintu ensabi ngemayuh nya.

GALAK… Gaya ensabi ke galak amat laban ditanam ba tanah ami.

“Nyau puntan runding laban ke enda kala bejual lalu dibai aku ngagai bala ti dikelala enggau terus dijual ba genturung pendiau sida.

“Enda datai lima minit aja 50kg ensabi nya diperebut sida laban dia pemadu mayuh bansa Iban ditemu aku.

“Bisi sekeda sida enda ampit lalu madah, ila nuan datai baru Ling, bejual ensabi baru.

Puas ga berunding, dini endur bulih leka ensabi nya baru tang nasip ga sida bekebun endur aku betanya nya madahka diri nemu dini endur meli leka sayur.

“Nasip amat bulih ga tudah aku leka ensabi lalu nyentuk diatu sigi nadai kala pungkang aku naruh leka ensabi,” ku Ling nusui kisah diri.

Gangging@Ling Sanggau mega madah, orang ke suah meli ensabi ari iya ngelama tu endang bansa Dayak lalu bisi ga bansa bukai ke diau ba Malaya nguji meli tang sida madahka sayur nya pait lalu apin teleba makai sayur nya.

Ku iya, chukup pengaga ati laban ensabi iya tumbuh galak lalu sekali ngambi datai 300 ngagai 400kg seminggu.
Naka diatu, Ling madahka iya bisi empat iku pengereja Indonesia dikena nyaup iya ngambi sereta ngagihka ensabi nya sebedau dijual ngagai mensia mayuh sebelah genturung pendiau enggau tamu di Puchong.

Ling madahka iya betanam ensabi tu ba bakut aja enggau ngena sum tai manuk nya.

 NERIMA PENEMUAI… Entara raban ari Sarawak ke kala datai ngabas kebun ensabi Ling di Puchong, Selangor.

Iya mega nadai ngena rachun enggau apin berunding deka nanam ensabi tu ngena chara baru.
Nambahka nya ku iya, ensabi ti ditanam ba bakut nya deka jampat tumbuh sereta galak ba tanah ami lalu baka ensabi ditanam iya, tiga minggu udah ulih dijual.

“Aku nadai kala nerima bantu ari perintah laban nadai kala minta, tambah mega pengawa betanamka ensabi tu nadai begunaka belanja ti besai.

“Sentang chara nanam ensabi tu terubah sida ngali tanah enggau mesin ngebur tanah lalu ditambah sekali enggau sum tai manuk.

“Udah nya, tabur ke rachun semut ba tanah. Sehari pengudah nabur rachun semut baru nabur ke leka ensabi.
“Enti enda tabur ke dulu rachun semut nya, abis empa semut meh leka ensabi nya.

“Tiga hari pengudah ditabur, ensabi deka mansutka daun lalu seminggu udah nya, ensabi mesti dichabut beri jarang enggau mantun rumput.

“Enti enda diberi jarang ensabi nya deka besendi lalu jampat luluh lebuh dipanjah ai.

“Bala pengereja aku deka nabur leka ensabi seminggu sekali, nya kebuah ensabi aku bisi belama dijual ninting minggu,” ku iya nerang.

NERIMA PEMINTA TINGGI

MANSUTKA MAYUH ASIL… Ba timpuh seminggu, Ling deka ngambi manggai 400kg ensabi.

Ling madah, iya kala nerima penemuai ari opis pemesai baka ari Sekretari Politik Kepala Menteri Sarawak, Christopher Romeo Tegong, Sekretari Politik Datuk Seri Alexander Nanta Linggi, Lidam Assam bala temenggung enggau tuai rumah.

Ngelansa pasal pemayuh ensabi diambi iya sebulan, Ling madahka dalam sebulan, kita 1,000 ngagai 1,200 kg ensabi ulih iya bepanggai ba gaya hari.

Ku iya, enti gaya hari manah baka musin kemarau, baru mayuh asil ensabi laban galak amat.

Tang ku iya, enti musin pengujan mimit aja ensabi ulih diambi laban bakut nyau tusur lalu ensabi mega luluh.

“Tambah mega, leka ensabi ke ditabur mega rarat ketegal bah. Nya kebuah, maya musin pengujan aku semina bulih 100 ngagai 150kg aja seminggu lalu enti sebulan kita 300 ngagai 500 kg aja.

“Aku nerima mayuh peminta tang kadang nya ensabi aku enda chukup belama.

“Aku nyual ensabi tu chara borong lalu bisi mega dijual aku empu di Pasar Borneo Seri Kembangan ninting Hari Enam.

“Dalam sebulan, untung aku manggai RM10,000 ngagai RM12,000 bepanggai ba gaya hari.

“Enti baka bulan nya musin pengujan, untung aku jauh kusut laban semina mansutka asil RM3,000 ngagai RM5,000 aja sebulan,” ku Ling nerang pasal untung iya nyual ensabi.

Ku Ling, maya pandemik tu iya nadai napi sebarang penanggul laban orang tetap ngiga iya lebuh sida deka meli ensabi tang diatu iya nyau jarang bejualka ensabi ba Pasar Borneo laban ke enda dibuka.

Iya madah, nasip ga diatu nyau bemacham inisiatif enggau servis dikena nganjung barang.

Nya kebuah, Ling madahka iya suah ngena servis penganjung baka Lalamove enggau Grab ke ulih nganjung semua produk ensabi nya ngagai bala penguna lalu ungkus nganjung nya endang ditanggung bala penguna empu.

KASAM ENSABI

Kelimpah ari nanam ensabi, Ling mega madahka iya bisi ngaga kasam ensabi tang jarang laban ensabi nya abis dijual belama.

Ku Ling, iya jarang ngaga kasam ensabi laban ensabi ke agi baru nya abis dijual belama.

Iya madah, semadi nyau bisi lebih ensabi nya baru aku ngaga kasam nya pen mimit aja.

“Chara aku ngaga kasam ensabi tu engka enda sebaka enggau orang bukai.

“Keterubah iya ensabi nya deka diberesi aku dulu dah nya diulur ba ai angat ke udah digulai garam.

“Pengudah nya, diteju dataika chelap dulu baru aku nuchi ensabi nya dikena muai bau bisa.

“Dah nya, diperuk aku enggau gambar baru, dilak ke chelap dulu lalu tambah enggau leka asi tauka ai but asi.

“Aku ngaga kasam nya semina empat hari aja, udah nya tau diempa.

“Kebendar, aku nerima mayuh peminta kasam ensabi tang aku ke enda sanggup ngereja pengawa nya kediri laban aku enda mayar pengereja, sida semina dibayar nanam ensabi aja.

“Tebal agi, sigi bansa Iban ke suah meli kasam ensabi aku lalu bansa China ba Malaya ditu bisi ke baru nguji deka makai kasam ensabi.

“Enti baka bansa Melayu ari menua kitai Sarawak, baru nemu makai kasam ensabi tang mimit aja ke diau ditu kala ditemu aku,” ku Ling nyimpul randau enggau Suara Sarawak.

BERITA LAIN

Chara gaga dulu bayar dudi disukung penuh

KUCHING: Perintah Besai nyukung penuh pengeran Sarawak ngerumban pekara pemansang kelebih agi nyeruri sekula enggau klinik repuk di menua tu nengah chara gaga dulu bayar

Sukma mantu ngangkat sosioekonomi rayat

KOTA SAMARAHAN: Pengawa ngatur Lumba Malaysia (Sukma) Ke-21 ba Sarawak ti nyadi tuai rumah endur ngatur lumba nya ulih meri pemaik ngagai rayat ari sukut

BERITA TERBARU

MPC komited pacu pembangunan hidrogen di Sarawak

KUCHING: Perbadanan Produktiviti Malaysia (MPC) Wilayah Sarawak komited memacu peningkatan produktiviti industri hidrogen di negeri ini melalui pemerkasaan inisiatif pembangunan rangka kerja peraturan hidrogen yang