Kitai deka nentuka sida ti pulai Pakan nadai dirampit Covid-19

PAKAN: Sebuah palan kuarantin udah diperambu ditumbuh ba Pakan dikena nentuka sida ti pulai ngagai pelilih tu nadai mai penyakit Covid-19.

Kaban Kunsil Nengeri (Adun) Pakan, Tan Sri William Mawan Ikom madah, palan nya disediaka ungkup peranak menua tu ke baru pulai ari Semenanjung Malaysia, Sabah, Labuan, luar menua enggau pengereja luar.

“Palan tu betuju nyamin sida ti pulai kitu nadai kena rampit taja sida udah kala ngurung diri sebedau datai ba Pelilih Pakan laban kitai irauka orang nya dirampit lebuh pulai ngagai Pakan.

“Palan ngurung diri ti diperambu nya ba Dewan Masyaralat Pakan lebuh nyendiaka palan khas enggau pekara tu deka dibantai ngagai Komiti Penyangga Penusah Ngenyit Bagi Menua ngambi berundingka pekara tu,” ku Mawan.

Mawan mansutka jaku nya pengudah nyadi tuai aum begulai enggau Pemesai Pelilih Pakan, Seroji Ludin, Polis DiRaja Malaysia (PDRM), Rela, Raban Penyaga Orang Periman Malaysia (APM), Opis Pengintu Pengelantang, Klinik Pengerai Pakan enggau Kaunsil Pelilih Meradong-Julau, ditu ensanus.

Suara Sarawak