Kitai mesti belajar ari sejarah – Uggah

BETONG: Perintah Gempung Parti Sarawak (GPS) patut diberi mandat baru merintah nengeri tu laban ngembuan ketuai ke chukup masai gawa enggau nyata dipeda, ku Sapit Kepala Menteri Datuk Amar Douglas Uggah Embas.

“Sekeda orang madah kitai mesti ngembuan ketuai enggau perintah ke baru.

“Kitai mesti belajar ari sejarah maya dibaruh pegai Perintah PH, kelalu mayuh ubah enggau “u-turn” nyelai lalu pengujung iya sida tumbang,’ ku iya.

Iya madah munyi nya maya ngelancharka Roadshow GPS Bukit Saban sereta ngelancharka Pampang PBB Brutan Ulu di Rh. Hendary Jawan di Serudit Atas, ditu malam Hari Enam tu tadi.

Berebak enggau nya, Uggah ke mega Sapit Presiden PBB madah, ketuai Parti Pesaka Bumiputera Bersatu (PBB) ba renggat baruh mesti nemu mayuh pasal polisi pemansang perintah ke digaga ke pemaik rayat.

Ari penemu nya, ku iya ketuai Indu, Besai Tuai enggau Nembiak ulih nampung penerang ngagai rayat lebih agi ba menua pesisir.

“Semua ketuai parti mesti ngembuan ulah cheredit berunding jalai mantu perintah nyungkak pengidup rayat nengah program enggau aktiviti ti nyungkak penatai pemisi.

“Perintah GPS udah bejalaika mayuh inisiatif lebih agi ba sektor betanam betupi dikena mantu orang bumai nengah sistem betanam betupi moden baka fertigasi enggau hidroponik.

“Komuniti Dayak ba menua pesisir mega patut ngambi bagi ba pengawa nupi jani laban peminta nya chukup besai lebih agi ba Singapura,” ku iya.

Suara Sarawak