KKM ngemendarka agih RM300 juta ungkup perengka guna pengerai di Sarawak

KOTA SAMARAHAN: Opis Menteri Pengerai Malaysia (KKM) ngemendar agih belanja manggai RM300 juta ungkup perengka guna pengerai ba Sarawak.

Ketuai Sekretari KKM, Datuk Seri Dr Chen Chaw Min madahka agih belanja nya dikemendar nengah Bajet 2021 ti dibantai pun bulan tu tadi.

“Mayuh pekara dipejalai ungkup perengkaguna pengerai di Sarawak dalam perambu ulih ubah.

“Tu nyengkaum merambu nyendiaka palan ngibun anak mit enggau palan paking entukar beringkat ba Sepital Besai Sarawak (SGH) kelimpah nyeleti sekeda klinik ba Sarawak,” ku iya.

Dr Chen mansutka jaku nya ba aum pemberita pengudah ngatur pejalai ngabas seraya gawa ngagai Sepital Tungkul Sengayuh Sarawak, ditu kemari.

Ku Dr Chen, perengkaguna pengerai ba SGH mesti dikemanah.

“Kami mega benung numbuhka makmal bank darah ti beoperasyen ba bulan March taun baru.

“Nambahka nya, projek nyeleti pagar ba Sepital Dalat beungkus RM500,000 mega dikemendar seraya Klinik Pengerai Oya mega diseleti ungkup pengelantang pesakit enggau pengusung,” terang iya.

Nangkanka nya ku iya, projek Klinik Pengerai Spaoh mega dikemendar engau projek nya deka dipejalai pengudah tinda dibuka ba taun 2022.

“Kambi mega nyendiaka sebuah mesin MRI ngena teknolgi pemadu baru ungkup Sepital Tungkul Sengayuh Sarawak enggau mesin spect dikena ngubat penyakit rimah ungkup SGH ti sedia dikena.

“Dikena nambahka pengawa beperesa Covid-19, JKN deka meli kereban pengerai kelebih agi ungkup dikena Sepital Limbang enggau Lawas laban kandang menua nya mar dilawa laban semak Brunei,” ku iya nerang.

Sama datai Menteri Kaunsil Kandang Menua enggau Pengawa Berumah, Datuk Seri Sim Kui Hian enggau Direktor Opis Pengerai Nengeri Dr Chin Zin Hing.